ବେସୁରା ଗୀତି-୭୦୪
ବେସୁରା ଗୀତି-୭୦୪
1 min
6.4K
ତୃଷ୍ଣାରୁ କାରେ ମୁକ୍ତି ଦିଅ ତୁମେ
କା ଓଠ ରେ ଦିଅ ନୂଆ ଭାଷା
ସଜଳ ଆଖିରେ ଚାହିଁଥାଏ କିଏ
ପୁରୁଥାଏ କାର ମନୋବାଞ୍ଛା ॥
ଶୀତଳ ସ୍ନିଗ୍ଧ ମୃଦୁ ମଧୁର
ସଜଳ ଆଖିରେ ଚାହିଁ କା ରେ
ରିମ ଝିମ ସ୍ଵରେ ଝଙ୍କାର ତୋଳି
ଆକାଶୁ ଓହ୍ଲାଅ ଧିରେ ଧିରେ ॥
ପ୍ରୀତି ରଙ୍କୁଣା ମନ ତଳେ କାର
ଭରି ରହିଥାଏ କେତେ ଆଶା
ବର୍ଷା ଗୋ ତୁମେ ଆଖିରେ ଆଖିରେ
ଭରି ଦିଅ କିଆଁ ଏତେ ନିଶା ॥
ରୌଦ୍ର ଦଗ୍ଧ ଏ ପୃଥିବୀ ର ଛାତି
ଶୀତଳେଇ ଦିଏ ତୁମ ଛୁଆଁ
ତା ହେଲେ କାହିଁକି ତୁମରି ସ୍ପର୍ଶ ରେ
କାହା ଛାତି ତଳେ ଜଳେ ନିଆଁ ?
ବର୍ଷା ଗୋ ତୁମ ଶୀତଳ ପରଶେ
ଶୀତଳେଇ ଦିଅ ମନ କାର
ପ୍ରୀତିର ବନ୍ୟାରେ ଭିଜାଅ ଗୋ ପ୍ରାଣ
ତୁମେ ହୋଇଯାଅ ଆପଣାର ॥