ମ୍ରୁତ୍ଯୁ ଆସୁ
ମ୍ରୁତ୍ଯୁ ଆସୁ
1 min
7.0K
ମୃତ୍ୟୁ
ଗୋଲାପରେ ଫୁଟୁ
ଅବା ଗୋଲାପ କଣ୍ଟାରେ
କିନ୍ତୁ ଫୁଟୁ
ଶତ୍ରୁର କମାଣରେ ।
ମୃତ୍ୟୁ
ହରିନାମରେ ଆସୁ
ଅବା ବଦନାମରେ
କିନ୍ତୁ ଆସୁ
ରାଷ୍ଟ୍ରିୟ ସଲାମର ସମ୍ମାନରେ ।
ମୃତ୍ୟୁ
ଦିନରେ ଆସୁ
ଅବା ରାତିରେ
କିନ୍ତୁ ଆସୁ
ସମୟ/ଅସମୟର
ଊର୍ଦ୍ଧ୍ବସ୍ଥ ଜାଗୃତିରେ ।
ମୃତ୍ୟୁ
ଲୁହରେ ଆସୁ
ଅବା ଲହୁରେ
କିନ୍ତୁ ଆସୁ ସାମ୍ନାସାମ୍ନି
ବୀରତ୍ବର ସଂଭ୍ରମରେ ।
ମୃତ୍ୟୁ
ତାଳୁରେ ବସୁ
ଅବା ତଳିପାରେ
କିନ୍ତୁ ବସୁ
ଯୁଦ୍ଧ ଭୂଇଁର ନିର୍ଭୀକ
ଛାତିର ଉପତ୍ୟକାରେ ।
ମୃତ୍ୟୁ
କଳାକନା ବୁଲାଇବାକୁ ଆସୁ
ଅବା ଧଳା କପଡା ଘୋଡାଇବାକୁ
କିନ୍ତୁ ଆସୁ
ସୈନିକ ମଥାରେ ରକ୍ତର ତିଳକ ମାରି
ନିଜେ ବାରମ୍ବାର
ପରାଜୟ ଲଭିବାରେ ।