ବାହାଘର ଫେସନ
ବାହାଘର ଫେସନ
ପୁଅ ବାହାଘର, ଝିଅ ବାହାଘର
ଏବେ ତ ଫେସନ ବଡ
ଶୀତଳ ପବନ ବହୁ ବହୁ ଲାଗେ
ଆସୁଛି ବିରାଟ ଝଡ ।
ବଦଳି ଗଲାଣି ରୂପଭେକ ତା’ର
ମୂଲ୍ୟ ବି ବଦଳିଲାଣି
ରୀତି ନୀତି ଖାଲି ନାମକୁ ମାତର
ପଛେ ସବୁ ରହିଲାଣି ।
ଶବ୍ଦ ଶୁଭୁନାହିଁ ଯୋଡି ମହୁରିର
ଶୁଭୁନି ବି ହୁଳହୁଳୀ
କାହିଁ ବା ସମଯ ନୀତି ନିୟମର
ସରେ ସବୁ ମାରି ତାଳି ।
ନାହିଁ ବାଟଘଷ, ମଙ୍ଗଳର ପାକ
ନାହିଁ ବି ତ ଆଳିପଣା
ବଡବଡିଆଙ୍କ ଆଶୀର୍ବାଦ ଆଉ
ଜରୁରୀରେ ନୁହେଁ ଗଣା !
ଝିଅର କାନ୍ଦଣା ଶୁଭିବା ବଦଳେ
ଚାଲିଛି ଡିଜେ ନାଇଟି
ରୋଶଣୀ ଆଲୁଅ ବଦଳେ ଲାଗିଛି
ଆଖି ଝଲସା ଲାଇଟି ।
ଆରିଷା କାକରା ଛେଞ୍ଚଡା ମହୁର
ହୋଲାଣି ଭୋଜିରୁ ଉଭାନ
ଏବେ ଚାଲେ ଖାଲି ନନ୍ ଭେଜ୍ ପାର୍ଟି
ତା’ ସାଙ୍ଗକୁ ମଦ୍ୟପାନ !
ପଙ୍ଗତରେ ବସି ଖାଇବା ନାହିଁ କି
ନାହିଁ କା’ରେ ଖୋସାମତ
ଯେମିତି ପାରିଲେ ସେମିତି ଖାଇଲେ
ସାରିକି ମାନମହତ ।
ବେଭାର ବନ୍ଦାଣ କାହାକୁ କୁହନ୍ତି
କିଏ ବା ପାରିବ କହି
ନାଲି କାଗଜରେ ଗୁଡା ଦରବର
ମହତ୍ତ୍ୱ କେବଳ ଥାଇ ।
ବରଯାତିରୀରେ ନାହାନ୍ତି ଘରର
ମୂରବୀ ସ୍ଥାନୀୟ ଲୋକ
ରଙ୍ଗ ଢଙ୍ଗ ଦେଖି ଆଖି ଖୋସିଯାଏ
ସବୁ ସିନେମା ନାୟକ ।
ମୁଣ୍ଡିଆ ଜୁହାର ପୁରୁଣା ଯୁଗର
ଏବେ ହାଏ ହ୍ୟାଲୋ ଖାଲି
କେମିତି ଝିଞ୍ଜଟ ସରିଲେ ଚଞ୍ଚଳ
ଆଉ ଠାଏ ଯିବେ ଚାଲି ।
ଅଳତା ସିନ୍ଦୂର ଲଗାଲଗି ନାହିଁ
ମେହେନ୍ଦୀ ଚାଲିଛି ବୋଳା
କାହିଁ ପାଟଶାଢି, କାହିଁ ବା ଚଉଁରି
ବେକର ଗଜରା ମାଳା ।
ଟିଭି ସିନେମାର ପ୍ରଭାବ ତ ବଡ
ପଡିଛି ବାହା ବେଦୀରେ
ଜୋତା ଚୋରୀ ଏବେ ନୂଆ କଥାଟିଏ
ଦେଖାଯାଏ ଘରେ ଘରେ ।
ଧୋତି କୁରୁତାର ଯୁଗ ନାହିଁ ଆଉ
ବର ପିନ୍ଧେ ଶେରୱାନୀ
ମାଳ କର୍ପୁରର, ଦୋଳ ମୁକୁଟର
ସ୍ଥାନେ ପିନ୍ଧେ ସେ ପଗଡି !
ଛାମୁଣ୍ଡିଆ ବନ୍ଧା, ଝୋଟି ଚିତା ପକା
କରିବ ବା ଆଉ କିଏ
ହୋଟେଲେ ମଣ୍ଡପେ ବାହା କରିଦେଲେ
ସବୁ ଚିନ୍ତା ଛିଡିଯାଏ !
ଜାତି ଅଜାତିର ଦେଖାଚାହାଁ ନାହିଁ
ଲୋଡା ନାହିଁ ପରମ୍ପରା
ପୁଅ ଝିଅଙ୍କର ମନ ମିଳିଗଲେ
ବାହାଘର ହେଇଗଲା ।
କିଏ ବା ପଚାରେ ସମ୍ମତି କାହାର
ଅଛି କି ନାହିଁ ଏଥିରେ
ସମୟ କା’ ପାଖେ ଅଛି ଯେ ଭାବିବ
ଭବିଷ୍ୟତ କଥା ବାରେ !
ଯେତେ ଧଡାଧଡ ସରେ ବାହାଘର
ସେତେ ଧଡାଧଡ ବିଚ୍ଛେଦ
ବେଦୀରୁ ବାହାରୁ ବାହାରୁ କୋର୍ଟରେ
ଚାଲୁହୁଏ ମତଭେଦ ।
ବିବାହ ବନ୍ଧନ ନୁହେଁ ଦି’ ଦିନର
କହିଥିଲେ ଋଷିମୁନୀ
ହେଲେ ସେକଥାକୁ କିଏ ବୁଝେଇବ
ସଭିଏଁ ତ ଏଠି ତୁନି !
-0-