ଜନପ୍ରିୟ କ୍ରିକେଟ

ଜନପ୍ରିୟ କ୍ରିକେଟ

ଖେଳୁଥିବା ଖେଳ ହୋଇ ଆମେ ମେଳ

      ସୁସମ୍ପର୍କ ଉଠୁ ଗଢି

ନିଜ ସାଥେ ମିତ     ସଭିଙ୍କର ହିତ

     କରେ ଏ ସମ୍ପର୍କ କଡି ।

ମିଥ୍ୟାର ଆଚାର    ରଜ୍ଜୁରେ ନାଚାର

     ସମ୍ପର୍କର ସେତୁ ଏବେ

ହୃଦୟକୁ ଜୟ      ନକରିଲେ ଭୟ

    ଆତ୍ମୀୟତା ନାହିଁ ଯେବେ ।

ଆତ୍ମୀୟତା ହୀନ     ସମ୍ପର୍କ ବିହୀନ 

     ଜୀବନରେ ହୋଇ ବନ୍ଦୀ

ନଥାଇ ସଦ୍ଭାବ     ଜୀଇଁ କିସ ଲାଭ

     ଜଞ୍ଜାଳରେ ଥିଲେ ଛନ୍ଦି ।

କ୍ରୀଡା ଜଗତରେ  ପାଦ ଦେବା ପରେ

    ଖେଳାଳି ହେଲେ ବି ଜଣେ

ବଢେ ମନୋବଳ     ପ୍ରତିଦ୍ବନ୍ଦୀ ଦଳ

     ସାଥେ ଲଢି ଖେଳରଣେ ।

ଦର୍ଶକ ବା ସାଥୀ    ସର୍ବେ ଏକ ଜାତି

      ସଦ୍ଭାବନା ଯହିଁ ପୂରେ

ଖେଳି ବି ବାଦରେ  ମୈତ୍ରୀ ସମାଦରେ

     ଭେଦଭାବ ଥାଏ ଦୂରେ ।

ସମସ୍ତ ପ୍ରକାର      ହୁଏ ଉପକାର

      ସମନ୍ୱୟ ଥିଲେ ଆସି

ଭିନ୍ନ ହେଲେ ମଧ୍ୟ  ଖେଳେ ଅନବଦ୍ୟ

      ପ୍ରଶଂସା ଉଠଇ ଭାସି ।

ଜନପ୍ରିୟ ଭାରି    ଆମୋଦନକାରୀ

     କ୍ରିକେଟ ଆମରି ଦେଶେ

ସାରା ଜଗତରେ  ଖେଳି ନାନା ସ୍ତରେ

    ଶୀର୍ଷରେ ରହିଛୁ ଶେଷେ ।