ପ୍ରେମର ଭାଷା

ମାୟାଧର ମାନସିଂହ

ସକଳେ ଡାକନ୍ତି 'ତମେ' 'ତମେ' ବୋଲି

ସେ 'ତମେ' ର ମୂଲ ନାହିଁ,

ତମେ ଯେବେ ମତେ 'ତମେ' ବୋଲି କହ

ଏତେ ମିଠା କାହିଁ ପାଇଁ ?

ଦୁଇଟି ଅକ୍ଷରେ କିଣି ନେଲା ପରି

କାନକୁ ମୋହର ଲାଗେ,

ଓଠ ତବ ସଖି ଭରିଦିଏ ତାକୁ

କି ଗଭୀର ଅନୁରାଗେ ?

କେତେ ତ ଡାକନ୍ତି ଦିନ ରାତି ସଦା

'ଶୁଣ' 'ଶୁଣ' ବୋଲି ମତେ,

ତମେ ଯେବେ ଆଖି ଠାରି 'ଶୁଣ' କହ

କେ ଜାଣି କି ପ୍ରାଣେ ଘଟେ !

କେତେ ନ ଶୁଣୁଛି ଦିନ ରାତି କହ

'ହଇକିଓ' 'ହଇକିଓ'

ତମେ ଯଦି ପଛୁ ଡାକ 'ହଇକିଓ'

ସୁଧା ଧାରା ଢାଳ 'କିଓ' ?

ହେ ପ୍ରେମ-ଦେବତା ଏ ପ୍ରେମୀ-ଯୁଗଳେ

କରୁଣା ତମର ଥାଉ,

'ତମେ'-'ଶୁଣ' ତଳେ ଦୁଇଟି ଛାତିର

ଡାକ ଦୁହେଁ ଯେହ୍ନେ ପାଉ ।

ସମାପ୍ତ