ରାଜ-ଦର୍ଶନ
ରାଜ-ଦର୍ଶନ
କବି ମାୟାଧର ମାନସିଂହ
କେଉଁ ଲୋକୁ ଆସି ଏଥି ପରବାସୀ
କଟିଲି ଦୀର୍ଘ କାଳ,
ଦେଖିଲି ଭୂଧର ଶ୍ୟାମପ୍ରାନ୍ତର
କ୍ରୀଡ଼ା ରବି,ତାରକାର ।।
ରାଜ୍ୟ ଦେଖିଲି ସିନା, ରାଜା କାହିଁ ?
ଅନ୍ତର ଉଠେ ଥରି,
ଗୋପନ ପ୍ରାସାଦ- ରୁଦ୍ଧ ଦୁଆରେ
ଯିବି କେଉଁ ପଥ ଧରି ?
ଜୀବନେଶ୍ୱରେ ଭୁବନେଶ୍ୱରେ
ଭେଟ ହେବି କେଉଁପରି ?
ତିକ୍ତ ମଧୁର ଦେଇଛ ପ୍ରଚୁର
ବିଚିତ୍ର ଅନୁଭବ,
ଦେଇଛି ନେଇଛି ଆଖିପତା ପୋଛି
ପ୍ରେମେ ଜୟ- ପରାଭବ,
ତୁମର ପ୍ରଣୟେ ଏବେ ପ୍ରାଣ କହେ
ଝାସିବ ଅଶ୍ରୁ ଭରି
ଅଭିଜ୍ଞତାର ମହାସିନ୍ଧୁରେ
ଆନନ୍ଦମୟ ଚିନ୍ମୟ ବୁଡ଼େ
ସହସ୍ର ମୋର ଛୋଟ ଅହମିକା
ଯେପରି ପଡ଼ିବ ଝରି ।
ଜୀବନେଶ୍ୱର, ହେ ଭୁବନେଶ୍ୱର,
ଭେଟ ମାଗେ ସେଇପରି ।
କେତେ ସାଥି ଆସି ଜୀବନ-ପତ୍ରେ
ଲେଖିଗଲେ କେତେ ବାଣୀ,
ବନ୍ଧୁ ବଇରି ଏ ଜୀବନ ଭରି
କେତେ ମିଳାଇଲ ଆଣି।
ଆଜି ମୋର ଖାତା ତୁମରି ବାରତା
ଧରିବ ସ୍ପଷ୍ଟ କରି,
ତୁମରି ବୀଣାର ମୃଦୁ ଝଙ୍କାରେ
ମୋ ନୟନ ଯିବ ଭରି ।
ଜୀବନେଶ୍ୱର, ହେ ଭୁବନେଶ୍ୱର,
ଭେଟ ହେଉ ସେହିପରି ।
ସମାପ୍ତ