କାନ୍ଦେ ଆଦିବାସୀ ପୁଅ

କାନ୍ଦେ ଆଦିବାସୀ ପୁଅ

 

ପର୍ଶୁରାମ ବିଶ୍ୱାଳ

 

ଶ୍ରୀମନ୍ଦିରରେ ବସି କହୁଚି କାଳିଆ ଆଖିରୁ ଝରାଇ ଲୁହ

ସ୍ୱାଧୀନତା ଅଡ଼ଷଠି ବିତିଗଲା, କାନ୍ଦେ ଆଦିବାସୀ ପୁଅ

ହେ ସର୍କାର ତମେ କରୁଚ କଅଣ

ଏହାର ଜବାବ ଦିଅ ।

 

ଆଦିବାସୀ ଗାଆଁ ନାହିଁ ରାସ୍ତାଘାଟ, ସେ ବଣ-ପାହାଡ଼ଘେରା

ପିଲା ଜନ୍ମଦେବ ମାଆଟିଏ କାହିଁ, ପଡ଼ିଚି ସେ ଅପନ୍ତରା

ବାଟ ନାହିଁ କେହ୍ନେ ଯିବ ମେଡିକାଲ

କି ଉତ୍ତର ଦବ ଦିଅ ।

 

କୁସଂସ୍କାର, ଅନ୍ଧବିଶ୍ୱାସ ଆଜି ତା ମନେ ବାନ୍ଧିଅଛି ବସା

ଗୁଣୀଗାରେଡ଼ି ସେ କରୁଚି ଭରସା, ହେଉଅଛି ଲୋକହସା

ସଚେତନତାର ବାର୍ତ୍ତାଟି ଏଯାଏ

କାହିଁକି ଦେଇନ କୁହ ।

 

ବଣ ଫଳମୂଳ, କାଠ ଆଶ୍ରା କରି ବିତାଉଚି ତା’ର ଦିନ

ତମର ବିକାଶଧାରା ଅପହଞ୍ଚ, କେବେ ଯିବ ତା ଦୁର୍ଦ୍ଦିନ

ବୃଥା ଖାଲି ଯାହା ପିଟୁଚ ଡିଣ୍ଡିମ

ସିଏ ଆମ ଗେହ୍ଲା ପୁଅ ।

 

କେବେ କୁହ ତମେ ବୁଝିବ ମୋ ସେଇ ଗରିବ ପୁଅର ଦୁଃଖ

ବଞ୍ଚିବା ପାଇଁ ସେ କରୁଚି ସଂଗ୍ରାମ, ଖୋଜୁନାହିଁ ରାଜସୁଖ

ତା’ର ଅଧିକାର ଦିଅ ସରକାର

ଛାଡ଼ି ଆଉ ସବୁ ମୋହ ।

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****