ଇଂରାଜୀ ନବବର୍ଷର ବାର୍ତ୍ତା
ଇଂରାଜୀ ନବବର୍ଷର ବାର୍ତ୍ତା
ସଂସାର ସୁଅରେ ଏ ଜୀବନ ଧାର
କେବେ ଧୀର କେବେ ଖର
ଘାତ ପ୍ରତିଘାତ ସହିବାକୁ ତାର
ନିଜେ ବିବେଚନା କର ।
ସୁଖଦୁଃଖ ଆଉ ମାନ ଅପମାନ
ମିଳିବ ସଂସାର ଠାରୁ
ଜୀଇଁବାକୁ ଏଠି ଅଥର୍ବ ସମାନ
ମିଛେ କେତେ ମନ ମାରୁ ।
ଖାଲଢିପ ପଥେ ଯିବୁ ପାର ହୋଇ
ଆସିଛୁ ଏଯାଏଁ ଯଦି
ପାରି ହେବୁ ବାଟ ଆଖିଲୁହ ଧୋଇ
ଜଞ୍ଜାଳ ଯେତେକ ଲଦି ।
କର୍ତ୍ତବ୍ୟ ଦାୟିତ୍ୱ ସରିବନି ଭାଇ
ଲାଗିଥିବ ଶୋକ ହର୍ଷ
ପୂର୍ବ ପରି ସବୁ ଭଲମନ୍ଦ ପାଇ
ବିତେ ବର୍ଷ ପରେ ବର୍ଷ ।
ଚୈତ୍ରମାସ ପରେ ଘରେ ଗ୍ରାମପୁରେ
ଫଗୁଣ ମିଠା ପରଶେ
ପୂଜାର ପାର୍ବଣେ ଭକ୍ତିରସ ପୂରେ
ଆମରି ନବ ବରଷେ ।
ବିଶ୍ବ ନିୟନ୍ତାଙ୍କୁ କୃତାଞ୍ଜଳି ଦେଇ
କରୁ ନିବେଦନ କେତେ
ନାଉରୀଟେ ହୋଇ ପାରି କରି ନେଇ
ହରିବାକୁ ଦୁଃଖ ଯେତେ ।
ପାଶ୍ଚାତ୍ୟ ଢାଞ୍ଚାରେ ପାଳୁ ଆଜି ସିନା
ନୂତନ ବରଷ କଳି
ଉତ୍ଶୃଙ୍ଖଳ ହୋଇ ଦୟାମାୟା ବିନା
କେତେ ଜୀବ ଦେଉ ବଳି ।
ନାଚଗୀତ ରସେ ମଦମାଂସ ଭାସେ
ନିଶାର୍ଦ୍ଧରେ ବାଣ ଫୁଟେ
ଆସକ୍ତିରେ ପୂରି ଭାବ ଯେବେ ଆସେ
ପବିତ୍ର ସମ୍ବନ୍ଧ ତୁଟେ ।
ଜଗତ ସେବାରେ ପରମାର୍ଥେ ଆମ
ଲାଗି ରହୁ ମନ ପ୍ରାଣ
ଶୁଭ ଅବସରେ କଲେ ଶୁଭ କାମ
ସଙ୍କଟୁ ପାଇବା ତ୍ରାଣ ।
ପ୍ରସନ୍ନ କୁମାର ମାଦଳା