ହେ ଗୁରୁଦେବ

( ଉଷାରାଣୀ ପଣ୍ଡା )

ତୁମେ ହିଁ ଈଶ୍ବର ବ୍ରହ୍ମା ମହୀଧର

ଜ୍ଞାନ ପ୍ରଦୀପ ଜଳାଇ,

ଦୂରୀଭୂତ କର ଅଜ୍ଞାନ ଅନ୍ଧାର

ଜ୍ଞାତସାର ତଥ୍ୟ ଦେଇ ।

ବିଦ୍ୟାଳୟର ଶ୍ରେଷ୍ଠ ପୂଜ୍ୟବର

ବିଚକ୍ଷଣ ଜ୍ଞାନ ବହି,

କରି ପରମାର୍ଥ ଶିକ୍ଷା ( ବିଦ୍ୟାର୍ଥୀ) ଭବିଷ୍ୟତ

ହିତ ଉପଦେଶ ଦେଇ ।

ମିତଭାଷୀ ଗୁଣେ ମଧୁର ଭାଷଣେ

ଶିକ୍ଷାର୍ଥୀ ମନ ମୁହାଇ ,

ଗୁଣରେ ପ୍ରବର ସର୍ବଗୁଣାକାର

ସ୍ନେହ ସୁଧା ବାର୍ତ୍ତା କହି ।

ନିରହଂକାରେ ସଂସ୍କାର ପଣରେ

ସୁବିଚାର ପଥେ ଯାଇ ,

କର ପ୍ରଭାବିତ ବିଦ୍ୟାର୍ଥୀ ମହତ

ଭବିଷ୍ୟର ସ୍ତମ୍ଭ ହୋଇ ।

ବାଣ୍ଟି ଜ୍ଞାନାମୃତ ଜ୍ଞାନେ ଖ୍ୟାତିପ୍ରାପ୍ତ

ପ୍ରେରଣାର ଉତ୍ସ ହୋଇ ,

ପରାମର୍ଶ ଦାତା ହେ ବିଦ୍ୟାପ୍ରଦାତା

ଲକ୍ଷ୍ୟର ହାସଲ ପାଇଁ ।

ଅଖଣ୍ଡ ଜ୍ଞାନର ବିଜ୍ଞାନୀ ପ୍ରବର

ଆଉ କିଏ ଅଛି କାହିଁ,

ଶୁଭ ଅବସରେ ଯୋଡି ବେନି କରେ

ପଖାଳୁଛି ପାଦ ଦୁଇ ।

ହେ ଜ୍ଞାନ ପୁରୁଷ ଢାଳ ଶୁଭାଶିଷ

ସତପଥେ ଯିବାପାଇଁ,

ହୃଦୟର ମୋର ଚଳନ୍ତି ଠାକୁର

ପ୍ରଣମୁଛି ମଥା ନଇଁ ।