ଆହ୍ୱାନ ମାଟି ମା'ର

ଅନଳକଣା ଗଗନୁ ଗଳି

ଓଡ଼ିଶା ମାଟି ପବନେ ଝଳି

ପ୍ରଳୟ ନିଆଁ ଯାଉଛି ଜଳି

କାରଣ କିସ ତାର , ଭାବ ହେ ବାରବାର ।

ଯେଉଁଠି ଦେଖ ପକାଇ ନଳ

ଶୋଷିଲା ଯହିଁ ଉଦ୍ଯୋଗ କଳ

ପାତାଳେ ଗଲା ଭୂମିର ଜଳ

ଚାଷୀର ହାହାକାର , ଶୁଣ ହେ ସରକାର ।

ଅନ୍ଧ ପୁଟୁଳି ବାନ୍ଧିଛ ଜାଣି

ରାତ୍ର ଦିବସ ନେଉଛ ଟାଣି

ଗଡିଆ ନଈ ପୋଖରୀ ପାଣି

ହେଲାଣି ଛାରଖାର , କରିବ କିଏ ପାର ।

ବର୍ଷକୁ ବର୍ଷ ଚାଲିଛି ମପା

ଯୋଜନା ଖାଲି ଦଫାକୁ ଦଫା

ବନ ସମ୍ପଦ ହେଉଛି ସଫା

ଏଥିକୁ ନିଘା କା'ର , ଭାବ କି ଦରକାର ।

ନଈରେ ଘାଇ ପଣକୁ ପଣ

କରି ଗଢିବା ନୂତନ ବଣ

ଜାଗି ଉଠ ହେ ଓଡିଆ ଜନ

ଫସଲେ ଭାରଭାର , ପୂରିବ ଘରଦ୍ୱାର ।

ମୁଣ୍ଡରେ ବୁଦ୍ଧି ପାରୁନି ପଶି

ଗଲାଣି ଯାହା ହାତରୁ ଖସି

ପାଇବ କେତେ ଝୁରିଲେ ବସି

ଭବିଷ୍ୟ ଅନ୍ଧକାର , କପାଳନିନ୍ଦା ସାର ।

ରଖିବ ଯଦି ମାଟିର ମାନ

ଏବଠୁ କର ଉପାୟମାନ

ପୋଡିବ ନାହିଁ ଆଗକୁ ଧାନ

ଶୁଣିବ ଜୟକାର , ବୁଝି ପାରିଲେ ଠାର ।

ପ୍ରସନ୍ନ କୁମାର ମାଦଳା