ମଦ କମାଲ

କେମିତି କହିବି ମଦ ଗୁଣ ଭାଇ

କହିବାକୁ ଲାଜ ଲାଗୁଛି

ମଦରୁ ଟିକିଏ ପେଟେ ପଡିଗଲେ

ଚଉଦ ଭୁବନ ଦିଶୁଛି ।

ଭେଣ୍ଡିଆ ପୁଅଟା କାମ ଧନ୍ଦା ଛାଡି

ଫରେନ ଲିକ୍ୱାର ପିଉଛି

ମଦର ନିଶାରେ ବାଉଳା ହେଇକି

ବାପକୁ ମଉସା ଡାକୁଛି ।

ସନ୍ଧ୍ୟା ହେଇଗଲେ ପଦନା ପରିଡା

ଭାଟିକୁ ନିଇତି ଧାଉଁଛି

ମଦରୁ ପେଟାଏ ପିଇ ଦେଇ ଆସି

ସ୍ତିରୀକୁ ତାହାର ପିଟୁଛି ।

ବାତରା ଟୋକାଟା ନିଇତି ନିଇତି

ପଲିଥିନି ଚୁଲୁ ପିଉଛି

ବାଟରେ ଘାଟରେ ଝିଅଙ୍କୁ ଦେଖିଲେ

ଭିଡାଭିଡ଼ି ତାଙ୍କୁ କରୁଛି ।

ମଦୁଆ ବାପଟା ପିଇବ ବୋଲିକି

ଏମିତି ପାଗଳ ହେଉଛି

ପିଇବା ପାଇଁକି ଛୁଆର ହାତରେ

ବୋତଲ ମଗେଇ ଦେଉଛି ।

ନେତା ବାଛିବାକୁ ଯେବେ ଯେବେ ପୁଣି

ନିର୍ବାଚନ ଋତୁ ଆଉଛି

ଗାଆଁର ଯୁବକ ମଦ ଟିକେ ପିଇ

ଭୋଅଟ ବାଡେଇ ଦେଉଛି ।

କିଏସେ ଜାଣିଛି ସତେକି ମଦରେ

ଏମିତି କଅଣ ରହିଛି

ନାବାଳିକା ଝିଅ ଦେଖିଦେଲେ ସୁଧା

ଅଠର ବୟସୀ ଲାଗୁଛି ।

ମଦ ପିଉ ପିଉ ମଣିଷକୁ ଯେତେ

ମଦଟା ଓଲଟି ପିଉଛି

ନିଶାରେ ନିଶାରେ ଅମଣିଷ ହୋଇ

ପାପ କେତେ ସିଏ କରୁଛି ।

ରାସ୍ତାଘାଟ ସବୁ ମଦୁଆଙ୍କ ପାଇଁ

ଡ଼ଲପ ଗଦି ଟେ ସାଜୁଛି

ଧର୍ମପତ୍ନୀ ବୋଲି ଭାବିକି ମଦୁଆ

କୁକୁର କୁଣ୍ଢେଇ ଶୋଉଛି

ସତରେ ଯେମିତି ମଦଟା ଗୋଟିଏ

ଏମିତି ପଦାର୍ଥ ହେଇଛି

ଠିପିଏ ସେଥିରୁ ପେଟରେ ପଡିଲେ

ବୁଦ୍ଧିଘର ଶୂନ୍ୟ ହେଉଛି ।

ସତେକି ଯେମିତି ଦୁନିଆରେ ଆଜି

ମଦଟା କମାଲ କରୁଛି

ପାଗଳ ମଣିଷ ବଇଆ ହୋଇକି

ତାହାରି ପଛରେ ପଡିଛି ।