ମେଘର ମୁରୁଜ

ମିତୁ ପଟ୍ଟନାୟକ

ଆଷାଢ ଆଙ୍କିଛି ଆଜି ଆକାଶରେ ଚୂନା ଚୂନା ମେଘଙ୍କ ମୁରୁଜ

ଝିପି ଝିପି ବରଷାରେ ଧୋଇ ଦେଇ ଧରଣୀର ଧୂସର ଦରବ l

ଢୁ ଢୁ ଖରାବେଳ କେବେ ଦିନେ ଜଳିଥିଲା ନିଦାଘ ନିଆଁରେ

ଅସରାଏ ଆଶା ନେଇ ଆଷାଢ ଯେ ବାର୍ଷୁ ଅଛି ବାରି ଅଗଣାରେ l

ଅମାନିଆ ଆଷାଢ ସେ ଅନୁରାଗେ ଛୁଇଁଯାଏ

ଯେତେ ସବୁ ଗୋପନର ତୁଠ

ସପନର ଶିହ ରଣେ ଚୁମି ଯାଏ ଚନ୍ଦ୍ରମାର ଚିତ୍ର ରେଖା ଓଠ l

କଦମ୍ବର ଋତୁରାଣୀ ଢାଳି ଦିଏ କାଦମ୍ବରୀ ବଂଶୀର ବ୍ୟଥାରେ

ତମାଳ ତନୁରେ ତୋଳି ତନ୍ମୟତା ସ୍ମୃତିର ଘାଟରେ l

ଆଷାଢ ଦେହରେ ଦେଇ ଅପେକ୍ଷାର ଶୀତଳ ସୀତ୍କାର

ଅଙ୍କାବଙ୍କା ନଈ ଗାଏ ଶ୍ରାବଣର କୋମଳ ଗାନ୍ଧାର l

ତେଣୁ ଏ ବରଷା ଆଜି ଆନମନା ମେଘ ଓଢଣୀରେ

ସତେକି ଝରାଏ ମଧୁ ପୀରତିର ଶ୍ୟାମଳ କ୍ଷେତରେ l

ଆଷାଢ ଆଲିଙ୍ଗନ ଆଜି ଲାଗେ ଆଶଙ୍କା ବିହୀନ

ଯେଉଁଠି ଛୁଏଁ ସେ ସେଠୁ ଶୁଣୁଥାଏ ଶ୍ରାବଣ ସ୍ପନ୍ଦନ l