Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Prasanna Kumar Madala

Others

3  

Prasanna Kumar Madala

Others

ଅଝଟିଆ ପିଲାଦିନ

ଅଝଟିଆ ପିଲାଦିନ

1 min
6.9K




ସମୟର ସୁଅ ବହି କେତେ ବାଟ

ଆଗକୁ ଆସିଛି ମାଡ଼ି

ଉଠାଣି ଗଡାଣି ଖାଲଢିପ ସବୁ

ପଛରେ ଆସିଛି ଛାଡ଼ି ।

ଚପଳାମି ଭରା ସରସ ଜୀବନେ

ଯେତେ ହୋଇଥିଲେ ମେଳ

ଗୋଟି ଗୋଟି କଥା ମନେ ପଡିଯାଏ

ସୁନ୍ଦର ସେ ପିଲାବେଳ ।

କଲି ଦୁଷ୍ଟ ଭଳି ଅଳି ଅରଦଳି

ମାଆର ଆଦର ବଳେ

ତଥାପି ସେସବୁ ଲୁଚି ଛପିଗଲା

ତାହାରି ପଣତ ତଳେ ।

ବାପା ସିନା ତାଙ୍କ କଠୋର ଶାସନେ

ଦେଖାନ୍ତି ନାଲିଆ ଆଖି

ଅଭିମାନ କଲେ ବୁଝାଇ ଶୁଝାଇ

ପାଖକୁ ନିଅନ୍ତି ଡାକି ।

ପରୀ ରାଇଜର କଥା ଶୁଣୁ ଶୁଣୁ

ଶୋଇ ମୋ ଜେଜେମା' କୋଳେ

କେଉଁ ରଜାଘର କୁହୁକ ରାଇଜେ

ସପନରେ ହଜେ ଭୋଳେ ।

କେବେ ବା କେମିତି ଅବହେଳା କଲେ

ପଢିବା ପାଇଁକି ପାଠ

ଶିକ୍ଷକ ଆମର ବରଷି ଦିଅନ୍ତି

ପିଠିରେ ତେନ୍ତୁଳି ଛାଟ ।

ଲୁଚି ଲୁଚି କାହା ବାଡିବଗିଚାରୁ

ଏହି ମୋ ହାତରେ ତୋଳି

ସାଙ୍ଗ ସାଥୀ ମେଳେ ଖାଇଛି ବି କେତେ

ସୁଆଦିଆ ଫଳ କୋଳି ।

ଭାରି ଭଲ ଲାଗେ ଲୁଣ ଲଙ୍କା ବୋଳି

ଖାଇବାକୁ କରମଙ୍ଗା

ବର୍ଷା ନାଳେ ଯଦି ଭାସିଯାଏ ମୋର

କାଗଜ ତିଆରି ଡଙ୍ଗା ।

କି ସୁନ୍ଦର ଥିଲା କପଟ ରହିତ

ଅଝଟିଆ ପିଲାଦିନ

ତୁଳନା କରିଲେ ଆଜିର ଜୀବନ

ଲାଗେ ତାହାଠାରୁ ହୀନ ।


ପ୍ରସନ୍ନ କୁମାର ମାଦଳା


Rate this content
Log in