ଆଗମନ କରିଲେ ବର୍ଷାରାଣୀ
ଆଗମନ କରିଲେ ବର୍ଷାରାଣୀ
କେତେ କଷ୍ଟକର ହେଲାଣି ଖରାର କାହାଣୀ,
ଦୁଷ୍କର ଦୁଃସାଧ୍ୟ ହେଲାଣି ଉତ୍ତାପରେ ରହଣି,
ଗ୍ରାମ ନଗରୀରେ ହେଲା ମେଘ ପାଇଁ ଚାହାଣି,
ଝୁମିଝୁମି ଆଗମନ କରି ନାଚିଲେ ବର୍ଷା-ରାଣୀ |୧|
ଘନଘନ ମେଘ ଟାଣିବାରେ ଯିଏ ଅତ୍ୟନ୍ତ ଗୁଣି,
ଛମଛମ ଟପଟପ ଧ୍ୱନି ଦିଏ ବର୍ଷାପାଣିର ବାଣୀ,
କଳକଳ ଝର୍ଝର ନାଦ କରିଲେ ନିର୍ଝର ନିର୍ଝରିଣୀ,
ଜଳପୂର୍ଣ୍ଣ ହୋଇ ଆନନ୍ଦ ଲାସ୍ୟ କରନ୍ତି ପୁଷ୍କରିଣୀ |୨|
ତଟିନୀରେ ଜଳକେଳି କରନ୍ତି ହୋଇ ତରୁଣୀ,
ବର୍ଷା-ରାଣୀ ସର୍ବଦା ସର୍ବଜନଙ୍କର ମଉଡମଣି,
ଅନବରତ କରି ହେବ ତାଙ୍କର ସ୍ତୁତି ବିବରଣୀ,
ମୌସୁମୀରେ ଚାଲୁ ରଖନ୍ତି ନିଜ ସମୟ ସାରଣୀ |୩|
ଜଳଚକ୍ରର ସୁଚାରୁ ଚଳନରେ ଯିଏ ସଦା ଲୟ-କାରିଣୀ,
ପ୍ରାଣଦାୟକ ପେୟ ଜଳଦାତ୍ରୀ ଦ୍ୱାରା ଯିଏ ସଦାଚାରିଣୀ,
ଏହି ଦୁନିଆର ସମସ୍ତ ଜୀବଜନ୍ତୁ ସର୍ବଜନ ତାଙ୍କର ଋଣୀ,
ବର୍ଷା-ରାଣୀଙ୍କ ହାତେ ଚିରହରିତ ସଜଳ ରହୁଛି ଧରଣୀ |୪|