ଆମ ଯୁବଶକ୍ତି

ପାଠ ପଢ଼ିବାକୁ ଛାଡ଼ି ବାପା ମା' ପାଣି ପରି ଟଙ୍କା ଗଣି

ଭାବନ୍ତି ପିଲାଏ ରୋଜଗାର କରି କରିବେ ସବୁ ଭରଣି ।

ପାଠ ସାଠ ସବୁ ସାରି ସେ ବେକାର ମୋହର ପିଠିରେ ମାରେ

ସରକାର ଦାୟୀ ବାପା ମା' କେହି ଗଦିରେ ନ ବସାଇଲେ ।

ସଜନା ଗଛଟେ ବାଡ଼ିରେ ପୋତେନା ବେକାରୀ ବାହାନା କରେ

ଗୋଡାଣିଆ ହେବା ତା ଭାଗ୍ୟ ଲିଖନ ନେତାର ପାଦ ସେ ଧରେ ।

ଲକ୍ଷେ ଟଙ୍କା ଗାଡ଼ି ବାପା ଦେଇଛନ୍ତି ପେଟ୍ରୋଲ ଲିଟରେ ଦାସ

ଚିକେନ ମଦରେ ବଶୀଭୂତ ସିଏ ବାପା ମା ନାହିଁ ଦିଶ ।

ଚାକର ହୋଇବା ଭାଗ୍ୟ ଲିପି ଭାବି ରହେ ମଦର ଆବେଶେ

ଯୁବଶକ୍ତି ଯଦି ମାଲିକ ହୁଅନ୍ତା କି ନହୁଅନ୍ତା ଏ ଦେଶେ !

କେଡେ ବିରୋଧୀ ସେ ହସନ୍ତି ବୁଲନ୍ତି ଭାଇକୁ ମାରୁଛ ତମେ

ଗାଁ ପରିବେଶ ନଷ୍ଟ କରିଦେଲ କୁଜି ନେତା ହେବା ଭ୍ରମେ ।

ସମ୍ମାନରେ ବଂଚି ଶିଖ ଯୁବଶକ୍ତି ସଜାଡ ଚକର ଅଖ

ନେତାଙ୍କୁ ତୁମର ଗୋଡାଣିଆ କର ମାଡ଼ ନାହିଁ ତାଙ୍କ ପାଖ ।

ଅମ୍ବାନୀ ଓବ୍ରୋଇ ସୁନାର ଚାମଚ ନେଇ ନଥିଲେ ଜନମି

କଠିନ ଶ୍ରମରେ ଶୁନ୍ୟରୁ ଆରମ୍ଭି ହୋଇଲେ ସାମ୍ରାଜ୍ୟ ଗାମୀ ।

ହଜାର ମାଇଲ ପଦଯାତ୍ରା ସିନା ପାଦ ଥାପି ଆଗେ ଯିବ

ଗଛକୁ ଚଢ଼ିବ ମୂଳରୁ ନାଁ ଶୁନ୍ୟେ ଡାଳ ଉପରେ ବସିବ !

ମୂମ୍ବାଇ ସଡକେ ବେଂଚରେ ଶୋଇକି ଅମିତାଭ ବିଗ୍ ବି

ସାଧନାରେ ସିଦ୍ଧି ମନ୍ତ୍ର ବୁଝିଗଲେ "କରିବି ମୁଁ ଦେଖାଇବି" ।

ନିଜ ଶକତିକୁ ଶୃଙ୍ଖଳିତ କରି ଜାଗରିତ କର ତନ୍ତ୍ରୀ

ସଂଘ ଅଫିସରେ ପୋଛା ମାରି ଜଣେ ଦେଶର ପ୍ରଧାନମନ୍ତ୍ରୀ ।