ମାଛ ଚୋରି
ମାଛ ଚୋରି
ନରିଆ ପୁରିଆ ଦୁଇଟି ଭାଇ
ମନ କଲେ ମାଛ ଖାଇବା ପାଇଁ ।
ମୁଗୁରା, ଜାଲକୁ ମୁଣ୍ଡରେ ବୋହି
ମାଛ ମାରି ଗଲେ ଚଅଁର ସାହି ।
ସେ ସାହି ମୁଣ୍ଡରେ ବଡ ପୋଖରୀ
ରୋହୀ ଭାକୁରରେ ଥିଲା ତ ପୁରି ।
ଗାଁଆ ଲୋକଙ୍କ ଉଠିବା ଆଗରୁ
ମାଛ ମାରି ଆଣିଦେବେ ସେଠାରୁ ।
ଚୁପଚାପ ହୋଇ ଖସି ଆସିବେ
ମନଭରି ମାଛ ଭଜା ଖାଇବେ ।
ନରିଆ ହାତରେ ଥିଲା ମୁଗୁରା
ବସାଇ ମାରିଲା ସେ ପଇଁତରା
ପୁରିଆ ନେଇଥିଲା ବଡଜାଲ
ଜାଲ ଫୋପାଡ଼ି ସେ ହେଲା ବେହାଲ
ପାରିଲାନି ଟାଣି ଫୋପାଡ଼ି ଜାଲ
ଭିଡିଭିଡି ହେଲା କି କଲବଲ ।
ନରିଆକୁ ଡାକି ବଡ ପାଟିରେ
କହିଲା ଜାଲକୁ ଟାଣ ଜୋରରେ ।
ଚେଷ୍ଟା ଦୁହିଁଙ୍କର ବ୍ୟର୍ଥ ହୋଇଲା
ପାଣି ଭିତରେ ପଶିବାକୁ ହେଲା ।
ପଙ୍କରେ ଭରିଥିଲା ସେ ପୋଖରୀ
ଖସିଗଲା ଗୋଡ ଛାଡିଲେ ହୁରୀ ।
ଧଣ୍ଡ ସାପଟିଏ କେଉଁଠି ଥିଲା
ଦୁହିଁଙ୍କ ଆଡକୁ ମାଡି ଆସିଲା ।
ବଞ୍ଚାଅ ବଞ୍ଚାଅ ଛାଡିଲେ ରଡି
ଗାଁ ଲୋକ ତହୁଁ ଆସିଲେ ମାଡି ।
କି ହେଲା କି ହେଲା ବୋଲି ବୋଇଲେ
ପାଟିଖନି ମାରି ଗଲା ହାଉଲେ ।
କହିଲେ ଦେଖିଲୁ ଭୂତ ଦିଭାଇ
ବଞ୍ଚାଅ ଆମକୁ ଏଠୁ ଗୋସାଇଁ ।
ଜାଲ ମୁଗୁରାକୁ ଛାଡି ସେଠାରେ
କାନମୁଣ୍ଡା ଆଉଁଷିଲେ ଯେ ଧିରେ ।
ମନକଥା ତାଙ୍କ ମନେ ରହିଲା
ଚୋରୀର ମାଛ ଖାଇବା ନୋହିଲା ।
ଘରକୁ ଫେରିଲେ ଖାଲି ହାତରେ
ବେନି ଭାଇ ଭଲ ଶିକ୍ଷା ଲଭିଲେ ।
କାନମୋଡି ହୋଇ ପ୍ରତିଜ୍ଞା କଲେ
ଚୋରି ଛାଡି ପରିଶ୍ରମ କରିଲେ ।