ମେହେନତି ହାତ
ମେହେନତି ହାତ
କାର୍ମିକ ଶ୍ରମିକ କୃଷକ ସୈନିକ ବୈଜ୍ଞାନିକ ଶ୍ରମ ବଳେ
ଦାନା କନା ମିଳେ ଦେଶ ରକ୍ଷା ହୁଏ ପ୍ରଗତିର ବାନା ଉଡେ ।
ନିରଳସ ସେହି ଶିରାଳ ହାତରେ ଗଢନ୍ତି ଦେଶ ଦଶକୁ
ଛାଲ ପଡିଯାଏ ହାତରେ ନାହିଁ କେ ଆହା ଟିକେ କରିବାକୁ।
ସମାଜର ମେରୁଦଣ୍ଡ ଏଇମାନେ ଶ୍ରମିକର ଶ୍ରମଦାନ
କୃଷକ ଯୋଗାଏ ଦାନା କନା କାରିଗର ଗଢେ ଅନୁଷ୍ଠାନ ।
ଘରଦ୍ବାର ରାସ୍ତା ମନ୍ଦିର ସହର ବିଦ୍ୟାଳୟ ପ୍ରେକ୍ଷାଳୟ ।
କାର୍ମିକ ଶ୍ରମିକ ନିର୍ମାଣ କରନ୍ତି ନାହିଁ ତାଙ୍କ ଶ୍ରମାଳୟ ।
ସୈନିକ ସୀମାରେ ସୁରକ୍ଷା ଯୋଗାଏ ଶାନ୍ତିରେ ଶୋଉଛୁ ଆମେ ,
ଆଭ୍ୟନ୍ତରୀଣ ବିପତ୍ତି ବେଳରେ ସହଯୋଗ ଆସେ କାମେ ।
ବୈଜ୍ଞାନିକ ଆମ ରାତି ଦିନ ଏକ କରି ଗବେଷଣା ଫଳ,
ନାଶା ପରିଯନ୍ତେ ମହାକାଶ ଯାତ୍ରା ହେଉଛି ହେଳେ ସଫଳ
ତ୍ରିଶୁଳ ଧନୁଷ ଅଗ୍ନି ପୃଥ୍ବୀ ଆଦି ଦେଶ ହିତେ ନିୟୋଜିତ
ସବୁଜ ଶ୍ୱେତ ଲୋହିତ ବିପ୍ଲବ ଅଗ୍ରଗତିର ସଂକେତ ।
ସମ୍ବର୍ଦ୍ଧନା କେବେ ଦିଏ ନାହିଁ କେହି ମେହେନତି ମଣିଷକୁ
ଭିଡର ମଣିଷ ପାଲଟି ଯାଏ ସେ ଶ୍ରେୟ ମିଳେନାହିଁ ତାକୁ ।
ଫରାସୀ ବିପ୍ଳବ ଅଗଷ୍ଟ ବିପ୍ଳବ ଇତିହାସ ଅଛି ସାକ୍ଷୀ
ସାମ୍ୟବାଦ ଚାଲେ ଭାଷଣରେ ଖାଲି ଧରମକୁ
ଠାରି ଆଖି ।
ବାସ୍ତବ ସମାଜେ ସମାନତା ଯଦି ଆସିବାର ଅଛି କେବେ
ମେହେନତି ମଣିଷକୁ ସମ୍ମାନ କରିବେ ସମସ୍ତେ ଯେବେ ।