ଲାଗନ୍ତା ବହୁତ ମଜା

ମୋ ଗାଆଁ ମୋତେ ଭାରି ଭଲ ଲାଗେ

ସତେ ମୋ ମାଆଟି ପରି ,

ଅତି ଆପଣାର-ଅତୀବ ସୁନ୍ଦର

କିଏ ହେବ ତା'ର ସରି !

ଚନ୍ଦନଠୁଁ ବଳି ଧୂଳି-ମାଟି ତା'ର

ବୋଳୁଥିଲି ପିଲାବେଳେ ,

ଭାରି ଇଚ୍ଛାହୁଏ,ଏଇ-ଲାଗେ ଥରେ

ଗଡ଼ି ଯାଆନ୍ତି ତା' କୋଳେ ।

କୁନି ପିଲାଟିଏ ହୋଇଯାଆନ୍ତି କି

ସମୟ ଯାଆନ୍ତା ଥମି ,

ଆଉ ଥରେ ମୁହିଁ ଆରମ୍ଭ କରନ୍ତି

ସେଇ ମିଠା ଚଗଲାମି ।

ତା' କୋଳରେ ଖେଳି-ବଣ,ବୁଦା ବୁଲି

ଖାଆନ୍ତି କଣ୍ଟେଇ କୋଳି ,

ବର ଓହଳରେ ସାଙ୍ଗ-ସାଥୀ ମେଳେ

ଖେଳନ୍ତି ବି ଟିକେ ଦୋଳି ।

ଆମ୍ବ ତୋଟାମାଳେ ଘୁରି ବୁଲନ୍ତି ମୁଁ

କୋଇଲି ସ୍ୱରକୁ ବାରି ,

ତା' ରାବକୁ ପୁଣି ନକଲ କରନ୍ତି

ସାଙ୍ଗମେଳେ ମିଶି କରି ।

ଗାଆଁ ଯାତ ଦେଖି ମଉଜ କରନ୍ତି

କିଣନ୍ତି ଖେଳଣା କେତେ ,

ନାନାଜାତି ପିଠା କରିକି ଖୁଆନ୍ତା

ଗେଲକରି ମାଆ ମୋତେ ।

ସତରେ ନା ଯଦି ଏମିତି ହୁଅନ୍ତା

ଲାଗନ୍ତା ବହୁତ ମଜା ,

ବରଷାରେ ଭିଜି ଗୀତ ଗାଆନ୍ତି ମୁଁ

କେସୁର ମାଇଲା ଗଜା ।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ ।