Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Kamala Satpathy

Others

2  

Kamala Satpathy

Others

ଜନ୍ମଦିନର ଉପହାର

ଜନ୍ମଦିନର ଉପହାର

2 mins
379


ପୂର୍ଣ୍ଣମୀ ରାତିର ତୋଫା ଜହ୍ନ ଦେଖି

ମନ ହୁଅଇ ଡହଳ ବିକଳ

ଭାବିଲେ ପତ୍ନୀକୁ ଡାକିବେ ପାଖକୁ

ବସିବ ଘଡିଏ କାଳ ।

ଦୁଇ ଦିନ ହେବ ରାଗିଛି ସୁନ୍ଦରୀ

କହି ନାହିଁ ପଦେ କଥା

ଅଭିମାନିନୀର ଶୁଖିଲା ମୁହଁଟା

ବଢୋଉଛି ଛାତି ବ୍ୟଥା ।

ଅଳି କରିଥିଲା ସୁନାହାର ପାଇଁ

ନିଜ ଜନମ ଦିନକୁ

ହାରଟେ ଦେବାକୁ ହେବ ବୋଲି ପତି

ଭୁଲିଗଲେ ଦିନଟିକୁ ।

ଶେଯରୁ ଉଠିକି ଦେଇ ବି ନାହାନ୍ତି

ଜନ୍ମଦିନର ଚୁମ୍ୱନ

ସେଥିପାଇଁ ଗୋରୀ ମାନ କରିଅଛି

ହସିନାହିଁ ପୂରା ଦିନ ।

କାମ ବାହାନାରେ ଯାଇଥିଲେ ଚାଲି

ସକାଳ ପହରୁ ଦୂରକୁ

ଫେରିଲା ବାଟକୁ ଚାହିଁ ବସି ପତ୍ନୀ

ବୁଝୋଉଥିଲା ତା’ ମନକୁ ।

ଭାବିଥିଲା ସ୍ୱାମୀ ଆଶ୍ଚର୍ଯ୍ୟ କରେଇ

ଆଣିବେ ସୁନାର ହାର

ତାକୁ ପିନ୍ଧି ସିଏ ସାଇ ମାଇପେଙ୍କୁ

ଦେଖେଇ ଦେବ ସତ୍ତ୍ୱର ।

ଚାହିଁ ଚାହିଁ ପାଣି ମଲା ତ ଆଖିରୁ

ଆସିଲେନି ବାବୁ ସଅଳ

ରାତି ଅଧେ ଫେରି, ବେଗେ ଶୋଇପଡି

କହିଲେ, “ଥକିଛି ପ୍ରବଳ ।”

କଡମଡ ଦାନ୍ତ କରି ଶେଯ ଛାଡି

ପଳେଇଲା ଆର ଘରକୁ

ରାଗିଲେ ରୁଷିଲେ ଏଇଠି ଶୋଇ ସେ

ଶୁଝାଏ ନିଜର ରାଗକୁ ।

କୋମିତି ଲୋକ ତା’ ଭାଗ୍ୟରେ ପଡିଛି

ଏଡିକି ନିର୍ଦ୍ଦୟୀ ନିଷ୍ଠୁର

ପତ୍ନୀକୁ ଜନମ ଦିନେ କେ ନଦିଏ

ଶୁଣିଛ କି ଉପହାର !

ଜାଚିକରି କେବେ ଦିଅନ୍ତିନି ବୋଲି

ମାଗିଥିଲା ମୁହଁ ଖୋଲି

ତଥାପି ପାଷାଣ ହୃଦେ ପ୍ରେମ ଭାବ

ପଡିଲା ନାହିଁ ଉଚ୍ଛୁଳି ।

କିରାଣୀକୁ ବାହା ହେଇଥିଲେ ବି ସେ

ରଖିଥାନ୍ତା କେତେ ଯତନେ

ତା’ପରି ରୂପର ଗୁଣର ପାଇ ବି

ମନ ବୁଝିଲେନି ଦିନେ ।

କି ଲାଭ ପାଇଲା ଅଫିସର ପତି

ବାହା ହୋଇ ବମ୍ୱେ ଆସିକି

କିବା ଜିନିଷଟା ମାଗିଥିଲା ଯେ ସେ

ଆଣି ନପାରିଲେ କିଣିକି !

ସେ କଥାକୁ ଗଣ୍ଠିକରି ମନେ ରଖି

ରୁଷିଛି ଚନ୍ଦର ବଦନୀ

ରାତି ଆସି ଦୁଇ ଘଡି ହୋଇଲାଣି

ତଥାପି ଗୁମାନ ଯାଇନି ।

ଆଜି ଏ ପୂର୍ଣ୍ଣମୀ ରାତିରେ ମନଟା

କେମିତି କେମିତି ହେଉଛି

ସେକଥାକୁ କ’ଣ ବୁଝୁଛି ସୁନ୍ଦରୀ

ହୃଦ ଯା’ କେବଳ ଦହୁଛି ।

ଛାର ଗୋଟେ ସୁନାହାର ପାଇଁ କେତେ

ରାଗ ଅଭିମାନ କଲାଣି

ବ୍ୟାଙ୍କ୍ ଖାତା ପଛେ ଖାଲି ହେଇଯାଉ

ଆଉ କରିବେନି ଭାଳେଣି ।

ହରଷ ବଦନେ ଯାଇ ଶରଧାରେ

ଡାକିଲେ, “ଗୋ ପ୍ରାଣପ୍ରିୟେ

କଥା ଦଉଛି ମୁଁ ସୂର୍ଯ୍ୟୋଦୟ ହେଲେ

ଆଣିଦେବି ଆଗ ଗୋଟିଏ ।

ରାଗନି ରୁଷନି ହସିଦେଇ ମୋର

ପ୍ରାଣକୁ ଶୀତଳ କର

ହାରିଯାଇ ମୁଁ ତ ଶରଣ ପଶିଲି

ଅଭିମାନ ଦୂର କର ।“

ଚାହିଁଲେ ତୀର୍ଯ୍ୟକ ନୟନରେ ପତ୍ନୀ

ତଉଲିଲେ ସେ କଥାକୁ

ରାତିର କଥାଟା ମନେ ରଖିବେ ନା

ଭୁଲିଯିବେ ସକାଳକୁ !

ଏ ମିଠା କଥାରେ ଭଳି ଯାଇଥିଲା

ବିବାହ ପରେ ସେ ଦିନେ

ହେଲେ ସେ କଥାର ନପାଇ ଫାଇଦା

ଜଳିଅଛି ମନେ ମନେ ।

ଆଉ ସେଇ ଭୁଲ୍ କରିବନି ବୋଲି

କରିଛି ସିଏ ଶପଥ

ଆଜି ପୁଣି ସେଇ ଚାଲାକିରେ ସ୍ୱାମୀ

ଭାଙ୍ଗିଦେବେ ତା’ର ବ୍ରତ ।

କହିଲା, “କଥାରେ ପରତେ ଯିବିନି

ଦିଅ ହାତକାଟି ଲେଖି

ବ୍ଲାଙ୍କ୍ ଚେକ୍ ରେ ସାଇନି ଦେଖିଲେ

ଛାଡିଦେବି ରୂଷା ଏଠି ।

ଦୁଇ ଦିନ କାଳ ରଗେଇ ରଖିଲ

ତେଣୁ ଦେବ ଜୋରିମାନା

ସୁନାହାର ସିନା ଜନମ ଦିନର

ରାଗ ପାଇଁ ଦିଅ କନା ।

ଯେଉଁ ହାର ମୁଁ ସେ ଦୋକାନେ ଦେଖିଛି

ଦାମ୍ ତା’ ପଚାଷ ହଜାର

କନା ବାବଦରେ ଆଉ କିଛି ଦେଇ

ଚେକ୍ କାଟ ଷାଠିଏର ।

ଆଉ କେବେ ଯଦି ଏ ଭୁଲ୍ କରିବ

ସାବଧାନ କରୁଅଛି

ଏତିକିରେ କେବେ ମାନିଯିବି ନାହିଁ

ଆଜିଠୁ କହି ରଖୁଛି ।“

ହାଁ କରି ପତି ଚାହିଁ ରହିଥିଲେ

ପୂର୍ଣ୍ଣମୀର ତୋଫା ଜହ୍ନକୁ

ଆସିଲା କିପରି ଅମାବାସ୍ୟା ରାତି

ଏତେ ଶୀଘ୍ର ଜୀବନକୁ !

ଗୋଟିଏ ରାତିର ବଦଳେ ଖସିଲା

ହାତରୁ ଷାଠିଏ ହଜାର

ସେଦିନରୁ ବାବୁ ଜହ୍ନକୁ ଦେଖିଲେ

ହୁଅନ୍ତି କଟର ମଟର ।

-0-


Rate this content
Log in