ମୋର ପ୍ରେମିକ – ୦୨
ମୋର ପ୍ରେମିକ – ୦୨
ଜାଣେନା ମୁଁ
ତୁମ ଧର୍ମ
ଜାତି, କୁଳ ଅବା ସମ୍ପ୍ରଦାୟ ।
କି ଚାହେନା ମୁଁ
ଜାଣିବାକୁ ସେଇ ସବୁ
ତୁଚ୍ଛ ପ୍ରଶ୍ନମାନଙ୍କ ଉତ୍ତର ।
ଜାଣେ ତୁମେ
ଏକ ଇ ଈଶ୍ଵର
ମାତ୍ର ଏଠି
ତବ ରୂପ ଅଟଇ ଅନେକ ।
ହେ ପ୍ରିୟ !
ଜାଣିଛି ମୁଁ
ତୁମ ଆଗେ ତୁଚ୍ଛ ସବୁ
ରୂପ, ଗୁଣ, ବର୍ଣ୍ଣ, ସମ୍ପ୍ରଦାୟ ।
ହେଲେ ଏଠି
ତୁମେ ତ ଅନେକ
ତୁମ ପାଇଁ ସୃଷ୍ଟ ଏଠି
ଶହ ଶହ ଧର୍ମ ସମ୍ପ୍ରଦାୟ ।
ତୁମ ପାଇଁ ବହେ ନିତି
ନିରୀହର ଉଷ୍ଣ ରକ୍ତଧାର ।
କିନ୍ତୁ ତମେ
ନିଶବ୍ଦ ନିଶ୍ଚଳ ।
ଜାଣେ ଏ ତ
ପ୍ରତୀକ୍ଷା ତୁମର
ସମୟର ପ୍ରବାହରେ
ଦେବା ପାଇଁ ଯଥୋଚିତ ଫଳ ।
ହେଲେ କେବେ
ଆସିବ ସେ ବେଳ ।
ଆସି ପାଶେ ବସି ମୋର
କହିବ - " ହେ ପ୍ରିୟେ ! ମୋର
ପ୍ରତୀକ୍ଷାର ଅନ୍ତ ଏବେ
ହୋଇଲା ତୁମର । "