ମୃତ୍ୟୁ ଓ ଭୟ
ମୃତ୍ୟୁ ଓ ଭୟ
ରୋମାଣ୍ଟିକ କବି ମାୟାଧର ମାନସିଂହ
ନିବିଡ଼ ଆଶ୍ଳେଷ ମଧ୍ୟେ ପ୍ରଶ୍ନ ବାରବାର
ଉଠିନି କି ପ୍ରିୟ ସଖି ?କଙ୍କଣ ଝଙ୍କାର
ସହସା ସ୍ତବ୍ଧ ହୁଏ,ଉନ୍ମୁଖୀ ଚୁମ୍ବନ
ରହିଯାଏ ଅର୍ଦ୍ଧପଥେ,ନିଃଶ୍ବାସେ କମ୍ପନ
ଆସେ ସେ କରୁଣ ପ୍ରଶ୍ନେ - 'ଭୃତ୍ୟ ମରଣର
କାହା ଅଙ୍ଗେ ଅଗ୍ରେ ଥୋଇ ତା' ଶୀତଳ କର
ନିଃସଙ୍ଗ କରିବ ଆନେ ?'- ଲାଗଇ କଳହ
ଦୁଇ ଜନେ, କରିବାକୁ ମରଣ ସଂଗ୍ରହ
ଆଗ ହୋଇ ଆନଠାରୁ ।ଆଜି କିନ୍ତୁ ସଖି
ସେ ଭୟ ନାହିଁଛି ଆଉ; ମତେ ଏଥି ରଖି
ଯାଅ ଯଦି ପରପାରେ,ପ୍ରେମ ମୃତ୍ୟଞ୍ଜୟ
ଶକ୍ତି ଦେବ ବିରହରେ ।ମରଣରେ ଜୟ
କରିବି ମୁଁ ଚିତା-ଭସ୍ମେ ଛାଇ ଦେହ-ସୀମା
ଦେହ ତଳେ ସୃଜି ତବ ମାନସୀ-ପ୍ରତିମା ।
ସମାପ୍ତ