Library
କରିଦିଅ ମୋତେ ସାଇଁ
କରିଦିଅ ମୋତେ ସାଇଁ
ବଟକୃଷ୍ଟ ସ୍ଵାଇଁ
ଏଡ଼େ ଝଙ୍କାଳିଆ ବରଗଛଟିଏ
ନ କରିଲ ପଛେ ନାହିଁ
ଛୋଟ ହେଲେ ହେଉ ତୁଲସୀ ଗଛଟେ
କରିଦିଅ ମୋତେ ସାଇଁ l
ମାଟି ଚଉରାରେ ସୋଭା ପାଉଥାଏ
ଦାଣ୍ଡେ ଅଗଣାରେ ଥାଇ
ଦିଅଁଙ୍କର ପାଶେ ଲାଗିହୁଏ ନିତି
ସୋହାଗ ଆଦର ପାଇ l
ଏତେ ବଡ ଜୀବ ହାତୀଟିଏ ମୋତେ
ନ କରିଲେ ପଛେ ନାହିଁ
ଛୋଟ ହେଲେ ହେଉ ମହୁମାଛିଟିଏ
କରିଦିଅ ମୋତେ ସାଇଁ l
ଫୁଲ ପାଶେ ଯାଇ ଗୁଣୁଗୁଣୁ ଗାଈ
ଆହାର ଆଣେ ମଧୁ
ପରହିତ ଲାଗି ବିତରି ତାହାକୁ
ଜଗତକୁ କରେ ବନ୍ଧୁ l
ଏଡ଼େ ମନୋହର ପଲାଶଫୁଲଟେ
ନ କରିଲେ ପଛେ ନାହିଁ
ଛୋଟ ହେଲେ ହେଉ ଗଙ୍ଗ ଶିଉଳିଟେ
କରିଦିଅ ମୋତେ ସାଇଁ l
ସଞ୍ଜରେ ଫୁଟି ମୁଁ ସକାଳକୁ ଝରେ
ମୁଖେ ଉକୁଟାଇ ହାସ
ହରେ ଜନମନ ମଧୁର ମହକେ
ଚହଟାଇ ଚଊପାଶ l
ଏଡ଼େ ସୁବିଶାଳ ସାଗର ପଛକେ
ନ କରିଲେ ମୋତେ ନାହିଁ
ଛୋଟ ହେଲେ ହେଉ ଟିକି ଝରଣାଟେ
କରିଦିଅ ମୋତେ ସାଇଁ l
କୁଳୁ କୁଳୁ ଗୀତ ଗାଇ ଦିବାନିଶି
ଡେଇଁ କେତେ ଗିରି ବନ
ବିତରି ଶୀତଳ ମଧୁର ଜଳ ମୁଁ
ତୋସୁଥିବି ଜନମନ l
ଏଡ଼େ ମୋନଲୋଭା ପୁନେଇଁ ଜହ୍ନ ମୁଁ
ନ ହେଲେ ପଛକେ ନାହିଁ
ଛୋଟ ହେଲେ ହେଉ ମାଟି ଦୀପଟିଏ
କରିଦିଅ ମୋତେ ସାଇଁ
ଜଳିଜଳି ଯାଉ ସଳିତାଟି ମୋର
ଅନ୍ଧାରେ ଆଲୋକ ଦେଇ
ପରହିତେ ଯିଏ ଜୀବନଟା ଦିଏ
ଜଗତରେ ଧନ୍ୟ ସେଇ l
