ଭକତିରେ କାହୁଁ ବାନ୍ଧିବାକୁ ଶକ୍ତି
ଭକତିରେ କାହୁଁ ବାନ୍ଧିବାକୁ ଶକ୍ତି
‘’ଭକତିରେ କାହୁଁ ବାନ୍ଧିବାକୁ ଶକ୍ତି -କିବା ! ଭକ୍ତି ଅବା ମୋର
ଡରି ମରି କୁହେ ମଣିମା ହେ ‘’ଦେହୀ.. ପଦ ପଲ୍ଲଵ ମୁଦାରଂ ‘’
ଘଟ ଘଟଣାକୁ କିଏ ବା ଜାଣିବ
ପେଟ ପାଟଣାର ଭବେ
ନିୟତି ନିର୍ଦ୍ଦେଶେ ଘଣ୍ଟାକରେ ପ୍ରଭୁ
କିସ ଘଟିବ ବା କେବେ ?
ଶରୀର ଵୀଣାରୁ ନିଶ୍ୱାସର ଟଣା
ତାର କେବେ ଯିବ ଛିଡି
ବଇଦ ବାପୁଡ଼ା ଚିପି ଚିପି ଟିପେ
ଖୋଜି ପାଇବନି ନାଡୀ ,
ଟାଣି ନେଇ ଯିବେ ମଶାଣି ଭୂଇଁକୁ
ମଲା ଗଲା ବୋଲି ଜାଣି
ରାତି ପାହିଗଲେ ଭୁଲି 'ଗତକାଲି'
ରଚିବେ ନୂଆ କାହାଣୀ ,
ଏଣୁ ଏ ଅଧମ ନିଜର ଭାବିଛି
ବନ୍ଧୁ ବୋଲି ତୋତେ ଖାଲି
ଭାବ ଦେଇ ଭାବ ରଖିବୁ ଗୋସେଇଁ
କୋକେଇ ଉଠିଲେ କାଲି ,
ସରଗ ଦୁଆରେ ଜାଗା ଟିକେ ଆଉ
ଖଣ୍ଡେ ତୋ ଛଡା ତୁଳସୀ
ନିରିମାଇଲର ଦାନା କେତେଗୋଟି
ବିଦା ଦେବୁ ଟିକେ ହସି ..... .. ।।
ତପନ ଦୀକ୍ଷିତ(ବେଳାଭୂମି)
ନାଶିକେଶ୍ୱର, କାକଟପୁର, ପୁରୀ