ଶୂନ୍ୟ
ଶୂନ୍ୟ
ମଶାଣି ରେ ଯାଇ ମୁଁ ପରଖିଲି
ଦେଖିଲି ସେଠାରେ ସିନ୍ଧୁକ ନାହିଁ
ନଖାଇ ନପିଇ ଧନ ସଞ୍ଚୁ ଅଛୁ
ଭାବୁଛି କେଉଁଠି ରଖିବୁ ନେଇ ।
ସମାଧି ଭିତରେ ଖୋଜିଲି ମୁ ଯାଇ
ଆଲମାରି ଗୋଟେ ପାଇଲି ନାହିଁ
ଧନ ଧନ ବୋଲି ଛଟପଟ ହେଉ
ଧନ କେଉଁଠି ତୁ ରଖିବୁ ନେଇ ।
କୋକେଇ ରେ ଥିଲୁ ଧଳାକପଡ଼ାରେ
ଖୋଜିଲି ପକେଟ ପାଇଲି ନାହିଁ
ମୁଁ ଚିନ୍ତା କରୁଛି ଅରଜିବା ଧନ
କେମିତି ସାଥିରେ ନେବୁ ଯେ ତୁହି ।
ଧନ ଧନ ବୋଲି ଜୀବନଟା ଗଲା
ଭଲରେ ମୁଠାଟେ ଖାଇଲୁ ନାହିଁ
ଏଇ ଦୁନିଆରେ ରାମନାମ ସତ୍ୟ
ବଞ୍ଚିଥିବା ବେଳେ ବୁଝିଲୁ ନାହିଁ ।
ଛ ଖଣ୍ଡ କାଠରେ ଯେବେ ଯାତ୍ରା କଲୁ
ଚିତ ହୋଇ ଶୋଇ ଶୂନ୍ୟ କୁ ଚାହିଁ
ରାମ ନାମ ସତ୍ୟ ଏ ସତ କଥାକୁ
ତୋ କାନରେ ଦେଲେ ମନେପକାଇ ।
ନା ଶୁଣି ପାରୁଥିଲୁ,ନା ବୁଝି ପାରୁଥିଲୁ
ନା ଦେଖି ପାରୁଥିଲୁ ଶୂନ୍ୟ କୁ ଚାହିଁ
ଶୂନ୍ୟରୁ ଆସି ମାୟାରେ ବଞ୍ଚି
ଶୂନ୍ୟରେ ପୁଣି ଗଲୁ ମିଳେଇ ।