ଦୂର ଦିଗଛୁଆଁ ସାହାରା ମରୁରେ
ଦୂର ଦିଗଛୁଆଁ ସାହାରା ମରୁରେ
ଦୂର ଦିଗଛୁଆଁ ସାହାରା ମରୁରେ
ଆଭାକାନ୍ତ ମହାନ୍ତି
ଦୂର ଦିଗଛୁଆଁ ସାହାରା ମରୁରେ
ମୁହିଁ ଜ୍ୟାମିତିକ ବିନ୍ଦୁ,
ଆଖିହଜା ସେଇ ନୀଳ ଆକାଶରେ
ତୁମେ ଗୋ ପୂର୍ଣ୍ଣିମା ଇନ୍ଦୁ । ୦ ।
ବାଲିଝଡ଼ ଉଠେ ଯେବେ ମୋ ଜୀବନେ
ତୁମେ ତା ଜାଣନା କିଛି,
ତାରକା ଗହନେ ହସି ଖିଲିଖିଲି
ଜୋଛନା ଦିଅ ଗୋ ବିଞ୍ଚି,
ବାଲିଶେଜ ପରେ ଶୋଇ ଶୋଇ ମୁହିଁ
ପିଏ ସେ ଅମୃତ ସିନ୍ଧୁ । ୧ ।
ନିଃସଙ୍ଗ ଜୀବନେ ଛାଇ ଟିକେ ଖୋଜି
ହୁଏ ମୁଁ ଯେବେ ହାଲିଆ,
ଶୁଏ ମୁଁ ଜୋଛନା-ପଖଳା ଅଙ୍ଗରେ
ବାଜିଲେ ଶୀତଳ ବାଆ,
ସପନ ଦେଖେ ମୁଁ ଖସିପାରୁନାହିଁ
ଏକ ଅଲିଅଳି ଫାନ୍ଦୁ । ୨ ।
ବହୁଦୂରେ ତୁମେ ଅଛ ଗୋ ଚନ୍ଦ୍ରମା
ଜାଣି ତ ପାରୁଛ ସବୁ,
କହି କି ପାରିବ ଗୋପନେ କିଏସେ
କରିଅଛି ମୋତେ କାବୁ,
କାହାକୁ ପାଥେୟ କରି ପାରିହେବି
ଦିଗହଜା ବାଲିସିନ୍ଧୁ ? । ୩ ।
ନୂଆସାହି, ବିଡ଼ାନାସୀ
କଟକ-୭୫୩୦୧୪
ଫୋନ୍-୯୦୪୦୦୦୩୧୦୧
*****