ପ୍ରେମ ଯାଗ

ଭରି ପେଟେ ରୋଷ  ଦେଖି କେଉଁ ଦୋଷ

     ଘାରି ତୁ ହେଉଛୁ ଫୁଲେଇ

ମରି ପଛେ ଯିବି       ମନେ ରଖିଥିବି

     ପାରି ହେବନାହିଁ ଭୁଲେଇ ।

ପାହାନା ଲୋ ଆଜି     ଚନ୍ଦ୍ରପ୍ରଭା ସାଜି

      ରତି ରତରତା ରଜନୀ

ବାହାନା ଯେ ଥାଉ   ଦୂରେ କେତେ ଆଉ

      ମତି ମାରୁଥିବ ସଜନୀ ।

ରହି ଦୁଇ ଘଡି       ଯାଅ ଟିକେ ବଢି

     ନେବୁ ପଛେ ଆଜି ବିରତି

ସହି ହୁଏ ନାହିଁ       ନ ଯାଅ ବି ପାହି

    ହେବୁ ସାକ୍ଷୀ ହେଲେ ପୀରତି ।

ତାଙ୍କ ଗାଆଁ ଦାଣ୍ଡେ    ଚାନ୍ଦ ଉଇଁ କାଣ୍ଡେ

     ଜୋଛନା ପେଶଇ ହରଷେ

ବାଙ୍କ ହୋଇ ଆମ     ଅଗଣାରେ କାମ

     ଶୋଚନା ବଢାଏ ପରଶେ ।

କାମିନୀ ବଗୁଲୀ     ତାଙ୍କ ଗାଆଁ ବୁଲି

     ନଦୀ ହିଡେ ଡେଣା ଝାଡଇ

ଭାମିନୀ ଆଗରେ     ବଗ କି ରାଗରେ

     ଲଦି ହୋଇ ଚଞ୍ଚୁ ବାଢଇ ।

ସେହି ଗାଆଁ ଗାଈ     ବାର ମାସ ଧାଇଁ

     ଘାସ ଚରେ ଆମ ଗାଆଁରେ

କେହିଜଣେ ଗୋରୀ  କରେ ଚିତ୍ତ ଚୋରି

     ଝାସ ଦେଇ ପ୍ରୀତି ନାଆଁରେ ।

ଘାଟେ ଥୋଇ ଘଟ     କରିଥିଲା ମଠ

     ଖର ହୋଇ ସଞ୍ଜ ବୁଡିଲା

ବାଟେ ଚାଲୁଚାଲୁ     ଆନମନେ ଭାଳୁ

     ଘର ବାଟ କିବା ହୁଡିଲା ।

ରାଜି ହେଲେ ତୁହି     ଯିବି ପଛେ ମୁହିଁ

     ରାସ ରଚି ପ୍ରେମ ଯାଗରେ

ଭାଜି ଯିବ ହିୟା     ନ ମିଳନ୍ତେ ପ୍ରିୟା

     ନାଶ ଯିବି ଶୋକ ସାଗରେ ।

      ପ୍ରସନ୍ନ କୁମାର ମାଦଳା