ମିଠା କଥା ଗୋଟି ମୋ ତୁଣ୍ଡେ ଭରିଦେ’

ମିଠା କଥା ଗୋଟି ମୋ ତୁଣ୍ଡେ ଭରିଦେ’

 

ପର୍ଶୁରାମ ବିଶ୍ୱାଳ

 

ଷାଠିଏ ପଉଟି ଭୋଗରୁ ଭାଗ ମୁଁ ଲୋଡୁନାହିଁ ଜଗନ୍ନାଥ

ମିଠା କଥା ଗୋଟି ମୋ ତୁଣ୍ଡେ ଭରିଦେ’, ଯୋଡୁଛି ମୁଁ ତୋତେ ହାତ

ପରକୁ ଆପଣା କରି ଏ ଜୀବନେ

କହୁ ଧନ୍ୟ ତୁ ସାଆନ୍ତ ।

 

ମିଠା କଥା ପଦେ କହିଥାନ୍ତା ଯେବେ ତୋତେ କୁରୁଚୂଡ଼ାମଣି

କୁରୁକ୍ଷେତ୍ର ଯୁଦ୍ଧ ହେଇ ତ ନଥାନ୍ତା ଭାଇ-ଭାଇ ହଣାହଣି

ଭକତର ମିଠା କଥାରେ ତୁ ବନ୍ଧା

ତୁ ତା ବନ୍ଧୁ, ଭାଇ, ସୁତ ।

 

ଅମୃତ ସମାନ ମିଠା କଥା ଗୋଟି ଯା’ ତୁଣ୍ଡରେ ଭରିଥାଏ

ସେ ଜଗତଜିତା ସଭିଏଁ ଜାଣନ୍ତି, ତା ସମାନ ହେବ କିଏ

ଶାନ୍ତି-ମୈତ୍ରୀ ବାର୍ତ୍ତା ଦିଏ ସମାଜକୁ

କରେନା ସେ ହନ୍ତସନ୍ତ ।

 

ଏଇ ମିଠା କଥା କହିରେ କାଳିଆ ଜିଣିବି ଲକ୍ଷ ହୃଦୟ

ବଇରିକି ବନ୍ଧୁ କରିବି ମୁହିଁରେ, ତୋର ପାଦେ ଥବ ଲୟ

ଏତିକି କରୁଣା ବାରି ଢାଳିଦେଏ

ମୋର ମୁଣ୍ଡେ ରଖି ହାତ ।

 

ମିଠା କଥା ଗୋଟି ସୁବାସିତ ଫୁଲ, ବାସନା ତା’ର ଇମିତି

ରାଗରୁଷା ଆଉ ଗରବ ଦମ୍ଭଟି ମିଳେଇଦିଏ କିମିତି

ସେନେହର ଧାରା, ପ୍ରେମର ସେ ଧାରା

ବହିଯିବ ଏ ମରତ ।

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****