ସେଦିନ ବରଷା
ସେଦିନ ବରଷା
ସେଦିନ ବରଷା
ଶରତ ଚନ୍ଦ୍ର ମହାନ୍ତି
ପ୍ରଥମ ଦେଖାରେ ଭିଜିଥିଲେ ଆମେ ଝିପିଝିପି ବରଷାରେ
ତୁମେ କହୁଥିଲ ଚୁପିଚୁପି କଥା, ଶୁଣୁଥିଲି ନୀରବରେ
ପାଖେଇ ଆସିଲା ଘର,
ଯିବା ପାଇଁ ତମେ କେଜାଣି କାହିଁକି ହେଲ ଭାରି ତରବର । ୧ ।
କରିପାରିଲିନି ମନା ମୁଁ ତୁମକୁ, ଖନି ମାରିଗଲା ପାଟି
ମୋ ପରିକା ଗୋଟେ ଡରକୁଳା ଲୋକ ଦେଖିନଥିବ କେଉଁଠି
ଏଯାଏ ପାରୁନି ଜାଣି,
ସତ କହୁଛି ମୁଁ, ମନକୁ ମୋହର ତୁମେ ତ ନେଇଛ ଟାଣି ।୨ ।
ଖାଇଲେ ବସିଲେ ଶୋଇଲେ ଯେଉଁଠି ନାଚିଉଠେ ତୁମ ମୁହଁ
ଅଜାଣତେ ମୋର ଲହଡ଼ି ମାରଇ ଆଖିରେ ଆଖିଏ ଲୁହ
ବୋଲ ମୋର ମାନେନାହିଁ,
ଝୁରି ଝୁରି ନିତି କଣ୍ଟା ହୋଇଲିଣି, କେବଳ ତୁମରି ପାଇଁ । ୩ ।
ସେଦିନ ବରଷା ଆଉଥରେ କ’ଣ ବରଷିବନାହିଁ ଏଠି
ଏ ଜୀବନେ କ’ଣ ତୁମକୁ ମୁଁ ଥରେ ପାରିବିନି ଆଉ ଭେଟି
ଯଦି ମୋ ଭାଗ୍ୟରେ ଥାଏ,
ବୋହୂ ବେଶ ସାଜି ତୁମେ ତ ଆସିବ ମୋ ଘରକୁ ଛାଏଁଛାଏଁ । ୪ ।
ମୋ ମନ ଯମୁନା କଦମ୍ବ ବନରେ ଜମିଯିବ ଭାରି ଭିଡ଼
କୁଆଡ଼େ ନଯାଇ ସେଇଠି ତ ଆମେ ରଚିବା ଗୋଟାଏ ନୀଡ଼
ଜୀବନ ସଂଗୀତ ଗାଇ,
ବଇଁଶିର ସୁରେ ବେପଥୁ ରାଗିଣୀ ବାଜୁଥିବ ରହିରହି । ୫ ।
ଆଗୋ ମାନମୟୀ ମୋ ରାଈ କିଶୋରୀ ଭାଙ୍ଗିବାକୁ ତୁମ ମାନ
ସାଇତି ରଖିଛି ତୁମ ପାଇଁ ଗୋଟେ ପ୍ରୀତି ମସଲାରେ ପାନ
ଦେବ ଯଦି ତାକୁ ଖାଇ,
ମନ କରିବନି କେବେହେଲେ ତୁମେ ମୋତେ ଛାଡ଼ି ଯିବା ପାଇଁ । ୬ ।
କନ୍ତିଲୋ, ନୟାହାଟ, ପୁରୀ
ଫୋନ୍-୯୪୩୯୫୦୩୫୮୮
******