ସାଇତି ରଖିଛି
ସାଇତି ରଖିଛି
ରହିଗଲା ସିନା ଅଧାଗଢ଼ା ହୋଇ
ତୋ ସାଥେ ପ୍ରେମ ସମ୍ପର୍କ
ଭଗ୍ନସ୍ତୂପ ପରି ସେହି ଇତିହାସ
ଗଢିଛି ସ୍ମୃତି କୋଣାର୍କ ll 1
ସାଉଁଟେ ଯେବେ ମୁଁ ବାଲିରେଣୁ ପରେ
ନରମ ତୋ ପାଦ ଚିହ୍ନ
ମୁରୁକି ହସରେ ପୂନେଇଁ ତିଥିରେ
ଦେଖାଦିଏ ରୃପା ଜହ୍ନ ll 2
ଲୁଚିଲୁଚି ଯେବେ ଭଗ୍ନ ଶିଳା ଦେହେ
ମୋ ତନୁ ଛୁଆଁ ଲାଗଇ
ଦେହେ ଶିହରଣ ଖେଳିଯାଏ ମୋର
ବିଜୁଳି ନିଆଁ ଛୁଟଇ ll 3
ଫିକା ସେଇ ଜହ୍ନ ଆଲୁଅ ଛାଇରେ
ତୋ ଛବି ଆଜି ଦେଖଇ
କାଉଁରୀ ପରଶେ ଭିଡି ନିଅ ଯେବେ
ତଳକୁ ପାଦ ଖସଇ ll 4
ଅମାନିଆ ତାରା ଖେଳେ ଲୁଚକାଳି
ଆମକୁ ଲୁଚି ଦେଖଇ
ବରଷା ଭିଜା ସେ ଗଛମୂଳେ ଠିଆ
ଆଜି ପରି ସେ ଲାଗଇ ll 5
ସତ କି ସପନ ଆଖି ମୋ ବୁଝେନା
ବୁଝେନା କିଛି ଏମନ
ପାଶେ ସିନା ନାହୁଁ ଅଛୁ ମୋ ହୃଦୟେ
ସାଇତିଛି ଏହି ପ୍ରାଣ ll 6