ବସନ୍ତ ମଳୟ
ବସନ୍ତ ମଳୟ
ଫଗୁଣର ଫଗୁ ବୁଣି ବୁଣି
ଆସୁଛି ବସନ୍ତେ ମଧୁର ମଳୟ ,
କୋକିଳର ସ୍ବନ ଶୁଣି ଶୁଣି
ଘାରୁଛି ସପନେ ସ୍ମୃତିର ବଳୟ ।
ହିମାନ୍ତେ ପବନ ରହି ରହି
ଦେଲାଣି ପରଷି ମିଳନ ସପନ ,
ଯିବ କି ତୁରିତେ ବହି ବହି
ଆସିବୁ ଦେଖି ମୋ ପ୍ରେୟସୀ ଲପନ ।
ଯହିଁ ଦେଖ ତହିଁ ଯୋଡି ଯୋଡି
ବିହଗଙ୍କ ମେଳେ ପ୍ରଣୟ ପ୍ରକାଶେ ,
ଅନ୍ତର ମୋ ଯାଏ ପୋଡି ପୋଡି
ଏକାନ୍ତରେ ଭାଳି ପ୍ରିୟାର ସକାଶେ ।
ମଳୟ ତା' କାନେ ତୁନି ତୁନି
କହିବୁ ପ୍ରେମୀ ତୋ' ବିରହେ ବିହରି ,
ଭବିଷ୍ୟେ ଶାବକ କୁନି କୁନି
କଳି କଳରବେ ଗଲିଣି ଶିହରି ।
ଦେଖ ଆମ୍ରବନେ କହୁ କହୁ
ସୁରଭି ପ୍ରସାରେ ନବୀନ ବକୁଳ ,
ମକର ପବନ ବହୁ ବହୁ
ତୋ' ବିନୁ ଲାଗଇ ପରାଣ ଶଙ୍କୁଳ ।
ବନେ ଉପବନେ ଡାଳେ ଡାଳେ
ଚହଟିବେ ଫୁଟି କୁସୁମ ମହକେ ,
ସଙ୍ଗମର ସୁରେ ତାଳେ ତାଳେ
ହୃଦୟ ମୋ ଜଳେ ତତଲା ଡହକେ ।
ଜଗାଏ ବସନ୍ତ ଧୀରେ ଧୀରେ
ସଭିଙ୍କ ହୃଦରେ ପୀରତି ସରାଗ ,
ସ୍ବଚ୍ଛ ନିର୍ଝରିଣୀ ତୀରେ ତୀରେ
ଭ୍ରମର ଅନ୍ବେଷେ ଫୁଲଙ୍କ ପରାଗ ।
ଋତୁରାଜ ବାସ ଛାଡି ଛାଡି
ଗଲେ ବ୍ଯର୍ଥ ହେବ ଯଉବନ ,
ସାଥୀ ପାଶେ ଆସି ମାଡି ମାଡି
ଗୋଲାପି ଅଧରେ ଦିଅନ୍ତା ଚୁମ୍ବନ ।
ପ୍ରସନ୍ନ କୁମାର ମାଦଳା
ଘର ନଂ - ଏଫ୍ / ୧୩
ସେକ୍ଟର - ୪
ରାଉରକେଲା - ୭୬୯୦୦୨
ଦୂରଭାଷ - ୭୯୭୮୧୯୨୨୨୭