ବିଡ଼ମ୍ବନା

ବିଡ଼ମ୍ବନା

 

ପ୍ରମୋଦ ପ୍ରଧାନ

 

ବିଡ଼ମ୍ବନା, ଭାଗ୍ୟକୁ, ପଚାରେ...

ମିଛର ଛାତିରେ ପ୍ରେମ-ପ୍ରୀତି କେତେଦିନ

ତିଷ୍ଠିପାରେ ?

ପ୍ରଶ୍ନ-ଉତ୍ତର ମଝିରେ

ପାଷାଣ ଛାତିରୁ

ଖାଲି ତାଜା ରକ୍ତ ଝରେ !

 

ଝରାଫୁଲ ଶେଫାଳୀ,

ସଞ୍ଜ ବୋଳେ ତା’ରେ ମହମହ ଯୌବନ,

ପାହାନ୍ତିଆ ତାରା ମୁହଁ ଦେଖି,

ରାତିର ତୃପ୍ତି-ଅତୃପ୍ତିରେ

ଯାଏ ସେ ତ ମଉଳି,

ନିରର୍ଥକ ଲାଗେ ତା’ର ସମ୍ପର୍କର ଚୌହଦୀ,

ରାତି ପାହିଯାଏ ସ୍ୱପ୍ନରେ ଭେଦିଭେଦି !

 

ଅସ୍ତିତ୍ୱର ଅସ୍ତଧାରେ

ଆଖି ଠାରେ ଯଦି ପ୍ରହେଳିକା,

କୁହୁଡ଼ିଆ ପାଚେରି ତଳେ

ରୁପାଜହ୍ନ ଆସି ଦିଏ ଦେଖା,

ସମୟର ପ୍ରତିବିମ୍ବ

ଟାଣିଦିଏ ପାପୁଲିର ଗାରେଗାରେ,

ହତଭାଗ୍ୟ ଅଶ୍ରୁଲେଖା !

 

ପ୍ରେମରେ ପ୍ରବଞ୍ଚନା,

ନିମିଷେ କରେ କେତେ ଆନମନା,

ସଞ୍ଚରିଯାଏ ଏଇ ଆମ ଶିରା-ପ୍ରଶିରାରେ

ବିଡ଼ମ୍ବନା ଆଉ ବିଡ଼ମ୍ବନା !

 

ଫ୍ରେଣ୍ଡସ୍ କଲୋନୀ, କଟକ

ଫୋନ : ୯୪୩୭୧୮୨୭୮୫

*****