ସମ୍ପର୍କ
ସମ୍ପର୍କ
ସମ୍ପର୍କ
.........
ଏକ ମହାସାଗର
କୋଳେଇ ନିଏ ଛୋଟ ବଡ଼ ନଦୀକୁ
ତା ସହ ବୋହି ଆଣିଥିବା
ଅବଶେଷ ଓ ଅବସୋସକୁ
ପାଲଟି ଲବଣାକ୍ତ
ନାଚୁଥାଏ ସହି ସବୁ ଜ୍ଵାଳାକୁ ।
ପିତା
........
ନିଜ ଅପ୍ରାପ୍ତିର ଅବସୋସକୁ
ବକ୍ଷେ ଚାପି ଧରି
ଜଳୁଥାଏ ଅହରହ
ଶେଷ ବିନ୍ଦୁ ତୈଳ ଥିବା ଯାଏ
ସଭିଙ୍କୁ ଆଲୋକ ଓ ଉଷ୍ଣତା ଦେଇ ।
ମା
.....
ଭୂ ରୁ ଭୂମା
ଘୋଡାଇ ପାରେ ପଣତରେ
ଶଶୀକୁ ଆକାଶରୁ ଛିଣ୍ଡାଇ
ଧରାଇପାରେ ସନ୍ତାନ ହାତରେ
ଠିକ୍ ମାର୍ଗରେ ନିଏ
କେବେ ସ୍ନେହରେ ତ କେବେ ଛାଟରେ ।
ପୁତ୍ର
.......
ହେଇପାରେ ଶ୍ରବଣ
ଅବା ପର୍ଶୁରାମ
ନଚେତ୍ କହ୍ନାଇ କି ରାମ
ମହକାଇ ଦିଏ ଜୀବନ
ନହେଲେ ନେଇପାରେ ବିରାମ ।
କନ୍ୟା
.........
ରତ୍ନ ଟିଏ
ଦୁଇ କୂଳର ମର୍ଯ୍ୟାଦା ପାଇଁ
ତିଳ ତିଳ ଜଳୁଥାଏ
ତଥାପି କେହି ଦେଖି ପାରନ୍ତିନି
ନା ନିଆଁ ନା ଧୂଆଁ ।
ସ୍ଵାମୀ
........
ଇହକାଳ ପରକାଳର ଦେବତା
ହାତେ ଶଙ୍ଖା ମଥାରେ ସିନ୍ଦୂର ଦେଇ
ସ୍ତ୍ରୀ ର ହର୍ତ୍ତା କର୍ତ୍ତା ଦଇବ ବିଧାତା ।
ଜାୟା
........
ପ୍ରେମ ପ୍ରଣୟ ରେ
ବାନ୍ଧି ରଖିଥାଏ ମନ ମଣିଷକୁ
ଜଳିପାରେ ସ୍ଵାମୀ ସୁଖ ପାଇଁ
ଜାଳିପାରେ ହାରିଲେ ବିଶ୍ୱାସ
ସ୍ଵାମୀ ସୁଖେ ସୁଖୀ ଦୁଖେ ଦୁଖୀ
ଗଲାଯାଏ ମଶାଣିକୁ ।
ବନ୍ଧୁ
......
ମୁହାଣ ସଦୃଶ
ବଢିଚାଲେ ଉତ୍ତମ ପରିବେଶେ
ଲୁଣି ଓ ମଧୁର ମିଶି
ଗଢିଦିଏ ନୂତନ ସମ୍ପର୍କ
ସ୍ନେହ ପ୍ରେମର ଅନନ୍ୟ ବନ୍ଧନ ।
.......... ପଦ୍ମାଳୟା