ମହାବାହୁ
ମହାବାହୁ
ତୁମେ ପରା ମହାବାହୁ ମହାପ୍ରଭୁ
ତୁମେ ପରା ମହାବାହୁ... ।
ଜାତ ଏ ସଂସାର ତୁମରି ଅଂଶାର
ସୂକ୍ଷ୍ମାତିସୂକ୍ଷ୍ମ ପ୍ରବାହୁ,
ମିଛେ ସିନା ଭିଡ କେ ଅଛି ନିବିଡ
ଉଦ୍ଧାରିବ ଚାହୁଁ ଚାହୁଁ,
ପ୍ରଭୁ , କା ଆଗେ କହିବି ଆଉ...।
ପ୍ରବାହ ପ୍ରବଣ ଗଢିଛ ପବନ
ଜଳରେ ଜୀବନ ଥୋଇ,
ଧରା ତଳେ ଧାରା ବୁହାଇଛ ସାରା
ନୀରଧି ଗରଭେ ଶୋଇ ,
ପ୍ରଭୁ , କେ ଆସି ରଖିବ କାହୁଁ...।
ପ୍ରାଣୀଙ୍କ ସକାଶ ଦେଇଛ ପ୍ରକାଶ
ଯତନେ ତପନ ଖଞ୍ଜି,
ଦିଶେ ନାହିଁ ଦିଶା ଶଶି ବିନେ ନିଶା
ତାରକା ରଚିଛ ରଞ୍ଜି,
ପ୍ରଭୁ , ଏ ଘୋର ରଜନୀ ପାହୁ...।
ପଡିଛି ବିପତ୍ତି ରଖ ହେ ଶ୍ରୀପତି
ଅବଶ ମୁଁ ଭବଜଳେ,
ନକଲେ ମୋଚନ ବୁଜିଲେ ଲୋଚନ
ଶମଶାନେ ଯଦି ଜଳେ,
ପ୍ରଭୁ , ରଖିବ କି ଦାହୁ ଦାହୁ...।
ତୁମେ ପରା ମହାବାହୁ ମହାପ୍ରଭୁ
ତୁମେ ପରା ମହାବାହୁ...।
ପ୍ରସନ୍ନ କୁମାର ମାଦଳା