ଆ ଜହ୍ନ ମାମୁଁ
ଆ ଜହ୍ନ ମାମୁଁ
ଆ ଜହ୍ନ ମାମୁଁ ଆ ଜହ୍ନମାମୁଁ ଶରଗ ଶଶୀମୋ କାହ୍ନୁ ହାତେ ପଡ ଖସି
ଅମୃତ ଖେଳନା ପୁଅ ହାତେ ଦେବ ଯଶୋମତି ମା' ଆଶି ।
ପ୍ରହେଳିକାଟିଏ ଯୁଗ ଯୁଗ ଧରି କବି ପ୍ରାଣର ଉପମା
ଚନ୍ଦନ ପେଡି ଗ୍ରୀଷମେ ଶୀତଳ ହୋଇବ ଅବା କେ ବାମା ।
ବିରହ ବିଧୁର ଚକୋର ଚକୋରି ପାଇଁ ଅଭିଶାପ ଧରେ
ଦିଗ ବଣିକର ନୀଳେନ୍ଦ୍ର ମଣିଟି ହାତୀ ଦାନ୍ତ ଫରୁଆରେ ।
ଶଶାଟିଏ ଅବା ମରଣ ଲଭିଛି ସରଗ ଯିବାର ବାଟେ
କୀରତି ନାରୀର ପଦର କର୍ଦମ ଲାଗିଛି ସରଗ ଘାଟେ ।
ସାମ୍ୟବାଦୀର ରୁଟିଟିଏ ଅବା ପୁରିବ ଗରିବ ପେଟ
ଜଉତିଷ ପାଇଁ ନବଗ୍ରହ ମଧ୍ୟେ ଦୁତୀୟ ଗ୍ରହର ଆଣ୍ଟ ।
ଅଭିଶାପ ଗ୍ରସ୍ତ ନାୟକ ଟିଏ ସେ ପକ୍ଷେ ଜିଏଁ ପକ୍ଷେ ମରେ
ଅମାବାସ୍ୟାର ଅମା ଅନ୍ଧାର ପୂର୍ଣିମାର ଅଭିସାରେ ।
ମହାକାଶଚାରୀ ପାଦ ଥାପି କଲା ଉପଗ୍ରହର ପ୍ରମାଣ
କୁମଦିନୀ ଜଳେ ଦିଏ ଆତ୍ମାହୁତି ସତୀନାରୀ ପତିପ୍ରାଣ ।
ଧନୀକ ବସିଛି ଜାଗା କିଣି ସେଠି ଗଢିବ ହୋଟେଲ ଶିଳ୍ପ
ଗରିବ ଏବେବି ବିଜୁଳି ନପାଇ ଖୋଜୁଛି ଆଲୋକ ଅଳ୍ପ ।
ଚନ୍ଦ୍ର ହେ ତୁମେ ବିଂଚୁଥାଅ ବସି ତୁମ ଶୀତଳ କିରଣ
ଅମା-ଆଲୋକର ଲୁଚକାଳି ଖେଳ ଯଥା ଜୀବନ-ମରଣ ।
ବିଶ୍ଵେଶ୍ୱର ମାଝୀ
9437697161
majhibisweswar@gmail.com