କୋଟି ହୃଦୟରେ ବଞ୍ଚିବି ମୁଁ ମରି
କୋଟି ହୃଦୟରେ ବଞ୍ଚିବି ମୁଁ ମରି
କୋଟି ହୃଦୟରେ ବଞ୍ଚିବି ମୁଁ ମରି
ପର୍ଶୁରାମ ବିଶ୍ୱାଳ
ରକତର ହୋରି ଖେଳିବାକୁ ହରି ସୀମାରେ କରିଚି ଘର
ସନ୍ତରାସବାଦୀ ଅନୁପ୍ରବେଶକୁ ରୋକିବା କାମଟି ମୋର
ଭୁଲିଯାଇଅଛି ମୋ ଘରସଂସାର
ତୁ ଏକା ସାହା ତା’ର ।
ବାପା ମୋର ବୁଢ଼ା, ବୋଉ ମୋ ରୋଗିଣା, କି କହିବି ମହାବାହୁ
ମୋର କିଛି ହେଲେ ବୁଝେଇବୁ ତାଙ୍କୁ, କାନ୍ଦିବେନି ଜମା ସେହୁ
ଦେଶ ପାଇଁ ତାଙ୍କ ପୁଅ ଚାଲିଗଲା
ଏ ଭାଗ୍ୟ ଅଛି କାହାର !
ମୋ ଖବର ଶୁଣି ଭୂଇଁରେ ଲୋଟିଣ କାନ୍ଦିବ ମୋର ଘରଣୀ
ଜନମ ଯାହାର ମରଣ ତା ଅଛି, ବୁଝେଇବୁ ବେଣୁପାଣି
ଜନ୍ମମାଟି ପାଇଁ ସ୍ୱାମୀ ଦେଲା ପ୍ରାଣ
ଗରବ ଏ ସିନା ତା’ର ।
ମୋ ଝିଅ କଥା ମୁଁ କି କହିବି ପ୍ରଭୁ, ଭାରି ସିଏ ଅଭିମାନୀ
ମୋ କଥା ଶୁଣି ସେ ମୂକ ହେଇଯିବ, ଜାଣିଚି ମୋର ବାୟାଣୀ
କିମିତି ତାକୁ ତୁ ବୁଝେଇବୁ ପ୍ରଭୁ
ଇଏ ତୋହରି ବିଚାର ।
ଏତିକି ମାଗୁଣି ହେ ଜଗନ୍ନାଥ ! କହିବୁ ମୋ ସାଇଭାଇ
ଭଲମନ୍ଦେ ଟିକେ ରଖିବେ ନଜର ମୋ ସଂସାର ମୁଁ ନାହିଁ
କୋଟି ହୃଦୟରେ ବଞ୍ଚିବି ମୁଁ ମରି
ଏ ସୌଭାଗ୍ୟ ଅଛି କା’ର ?
ଗ୍ରା.-ମିତ୍ରସେନପୁର, ପୋ.ଅ.-ଗମୁଁ
ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪
ଫୋନ୍-୯୮୫୩୭୫୯୭୦୦
*****