ଚାକିରିଆଙ୍କର ଭାଗ୍ୟ
ଚାକିରିଆଙ୍କର ଭାଗ୍ୟ
ଘରଣୀଙ୍କ ସ୍ୱରେ ମେଘର ମହ୍ଲାର
କାନକୁ ଶୁଭୁଛି ମିଠା
ପତିଙ୍କର ନିଦ ଭାଙ୍ଗିଗଲା ବେଗେ
ଦେଖି ଏ ଅଦ୍ଭୁତ କଥା ।
ଆଜିର ସକାଳ ଏଡେ ମୁଗ୍ଧକର
କାହିଁକି ହୋଇଛି ଏତେ
କାମଦାମ ଛାଡି ପତିଙ୍କ ସେବାରେ
କେମିତି ଛିଡା ସେ ସତେ !
ଆଶଙ୍କାରେ ଛାତି ଦବି ଦବି ଯାଏ
ଶୁଣିବେ କି ଫରମାଇସି
କେଜାଣି କେମିତି ଅଦିନ ମେଘଟା
ସକାଳୁ ଯାଉଛି ବର୍ଷି !
“ଶୁଣୁଛ କି ଆହେ ଲଣ୍ଡାବାପା ତୁମେ
ଆଜିର ସକାଳ ଖବର
ଦରମା ବଢିବ ଆଖବୁଜା କରି
ଟିଭିରେ କହିଲେ ସର୍କାର !
ପ୍ରମୋସନ ହେବ, କ୍ୱାଟର ମିଳିବ
ମିଳିବ ବି ଗାଡି ଘୋଡା
ଏତେ ବର୍ଷ କାଳ କଷ୍ଟ କରିଥିଲ
ପାଇବ ସୁଫଳ ଥୋଡା ।
ନୂଆ ସରକାର କରନ୍ତି ଘୋଷଣା
ସଭିଙ୍କ ଦୁଃଖ ହରିବେ
ସହରଠୁ ନେଇ ଗାଁ ମୁଣ୍ଡ ଯାଏ
ମୁହେଁ ହସ ଫୁଟାଇବେ ।
ଉଠ, ଉଠ, ଆଉ ନକରିକି ମଠ
ପୂର୍ବ ଆକାଶକୁ ଦେଖ
ସୌଭାଗ୍ୟର ସୂର୍ଯ୍ୟ ହସି ହସି କୁହେ
ବିତିଲା ସଭିଙ୍କ ଦୁଃଖ !
ଉପାସ ଭୋକରେ ନ ସଢିବେ କେହି
ଆତ୍ମହତ୍ୟା ନ କରିବେ
ଖଟିଖିଆ ଠାରୁ ଚାକିରିଆ ଯାଏଁ
ସୁବିଧା ସବୁ ପାଇବେ ।
ପନ୍ଦର ଦିନରେ ଦରମା ଟଙ୍କାଟା
ହେବ ନାହିଁ ଅନ୍ତର୍ଦ୍ଧାନ
ଲଣ୍ଡା ସ୍କୁଲ୍ ଫିସ୍ ଭରିଲା ବେଳକୁ
ହଜିଯିବ ନାହିଁ ଜ୍ଞାନ ।
ପନ୍ଦର ବର୍ଷର ଗୃହସ୍ଥି ଭିତରେ
ସଉକି କରିନି କିଛି
ଦରମା ମିଳିଲେ ଗହଣା କିଣିବି
ଆଗରୁ କହି ଦଉଛି ।
ପଡିଶା ଘରର ଦାମାବୋଉ ଆସି
ମାଗିଲା ତା’ ମାଣେ ଚାଉଳ
ଦିନ କେଇଟାରେ ଦେଇ ଦେବି କହି
ଫେରେଇ ଦେଇଛି ସଅଳ ।
ଖୁସିରେ ଚମକେ ଲଣ୍ଡାବୋଉ ମୁହଁ
ଲଣ୍ଡାବାପା ଦେଖି ତୋବା
କେମିତି ବୁଝେଇ କହିବେ ପତ୍ନୀକୁ
ଏସବୁ ଗୋଲକ ଧନ୍ଦା !
ସର୍କାରୀ ଘୋଷଣା ନାମକୁ ମାତର
ଧୂଆଁବାଣ ସମ ଅଟେ
ଦରମା ବଢିବା କଥା ଉଠୁ ଉଠୁ
ଆକାଶ ପାତାଳ ଫାଟେ ।
ଘରବାଲା ଭଡା ଦିଅନ୍ତି ବଢେଇ
ଦାମ୍ ବଢେ ପରିବାର
ଡାଲି ଚାଉଳ ଅପହଞ୍ଚର ଇଲାକା
ବଢେ ଫିସ୍ ଡାକ୍ତରର ।
ବାଟ ଖର୍ଚ୍ଚ ବଢେ, ଦରଦାମ ବଢେ
ସ୍କୁଲ୍ ର ଦରମା କାଳ
ଖଟିଖିଆ ଚଳେ ଯେମିତି ସେମିତି
ଝଡେ ଚାକିରିଆ ବାଳ ।
ଚାକରାଣୀ ମାଗେ ଦରମା ଅଧିକା
ଦି’ ଗୁଣା ମାଗେ ଧୋବଣୀ
ମାଛ ମାଉଁସର ସ୍ୱାଦ କଥା ପାଟି
କେବେଠୁ ଭୁଲିଗଲାଣି !
ସର୍କାରୀ ଘୋଷଣା ପରେ ସବୁ କଥା
ରୁହେ ନାଲି ଫିତା ତଳେ
ହାକିମ ମାନଙ୍କ ଦୟା ହେଉ ହେଉ
ମହଙ୍ଗାଇ ବଢିଚାଲେ ।
ଲଣ୍ଡାବୋଉଙ୍କର ଭାଗ୍ୟରେ କେବଳ
ଦେଖିବାକୁ ଲେଖା ସ୍ୱପ୍ନ
ଗହଣା କଅଣ, ସୂତୀ ଶାଢିଟେ ବି
କିଣିବାକୁ ନାହିଁ ଧନ ।
ଲଣ୍ଡାବାପା ମାନେ ଜୀବନଟା ଯାକ
ଖଟନ୍ତି ଗଧର ସମ
ସୀମିତ ଆୟରେ ସଂସାର ଚଳେଇ
ଭୁଲନ୍ତି ନିଜର ନାମ ।
ଦରମା ବଢିବା କଥାଟା ଲାଗଇ
ଶୁଣିବାକୁ ସିନା ଭଲ
କେମିତି ପତ୍ନୀକୁ ବୁଝେଇବେ ଭଲା
ଏ ତ ଗୋଟେ ମାୟାଜାଲ ।
ଦରମା ବଢିବା ନବଢିବା ସଙ୍ଗେ
କିଛି ତ ସଂପର୍କ ନାହିଁ
ଚାକିରିଆଙ୍କର ଭାଗ୍ୟରେ ଲେଖା
ହନ୍ତସନ୍ତର ଜୀବନ ସେହି !