ଋତୁରାଜ
ଋତୁରାଜ
1 min
6.6K
ଶୀତ ଗଲା ଯେବେ ଫେରି ଫେରି
ବସନ୍ତ ଆସିଲା ଥିରି ଥିରି
ଚାଦରର କାମ ଗଲା ସରି
ପଙ୍ଖାଟି ବୁଲୁଛି ଘିରି ଘିରି ।
ମଳୟ ବହୁଛି ସିରିସିରି
ପିଲାଏ ହସନ୍ତି କିରିକିରି
ଶୀତର ରାଜୁତି ଗଲା ସରି
ବଉଳ ପଡଇ ଝିରି ଝିରି ।
ଯାନିଯାତ ଆସେ ଫେରି ଫେରି
ବିମାନେ ଠାକୁର ଧରି ଧରି
ଭକତା ବୁଲନ୍ତି ଘିରି ଘିରି
ଖାଇବେ ଆନନ୍ଦେ ଖିରିପୁରି ।
ଉପବନେ ପୁଷ୍ପ କେରିକେରି
ପାଖରେ ଭଅଁର ଘୂରି ଘୂରି
ଫୁଲରୁ ସେ କରେ ମଧୁ ଚୋରି
କିଏ ସେ ପାରିବ ତାକୁ ଧରି ।
ପ୍ରଜାପତି ଚାହେଁ ଉକ୍ତିମାରି
ପୁଷ୍ପ ତନୁଯାଏ ଛୁଇଁ କରି
ସେ ପରିବେଶର ଦିବ୍ୟଶିରି
ଦେଖିବାକୁ ଇଛା ମନ ଭରି ।
ବସନ୍ତ ଋତୁ ଯେ ଉପକାରୀ
କୁହ କେ ହୋଇବ ତା’ର ସରି
ସଭିଙ୍କର ପ୍ରାଣେ ଖୁସି ଭରି
ଧୀରେ ଧୀରେ ପୁଣି ଯାଏ ଫେରି ।