ଦୁଷ୍ଟ ନାତିଆ

ଆଈ କହିଥିଲା ଅଜା କାନରେ

ମୋ ପାଇଁ ଆଣିବ ମିଠା ପାନ

ପାନରେ ପକେଇ ମିଠା, ଗୁଜୁରାତି

ଖାଇଲେ ଦେଖିବି ସପନ ।

ଅଜା ଆଣିଥିଲେ ପାନ ହାଟରୁ

ରଖିଥିଲେ ତାକୁ ଲୁଚେଇ

ଦେଖିଥିଲା ତାକୁ ନାତିଆ ଟୋକାଟା

ନେଇଗଲା ନାତି ଚୋରେଇ ।

ଅଜା ବସିଥିଲେ ଦାଣ୍ଡ ଦୁଆରେ 

ପକାଇଲା ଯେ ହୁରି ଆଈ 

କୋଉଠି ରଖିଛ ମୋ ମିଠା ପାନକୁ

ଖୋଜି ଖୋଜି ମୁଁ ପାଉନାହିଁ ।

ଧାଇଁ ଗଲେ ଅଜା ପାନ ପାଖକୁ

ଖୋଜି ଖୋଜି ହେଲେ ହତାସ

ଆଣିଥିବା ପାନ ପାଇଲେନି ଅଜା

କରିଥିଲେ କେତେ ପ୍ରୟାସ ।

ଅଜା ଆସିଲେ ତ ମନ ଦୁଃଖରେ

ବସିଲେ ଆଈର ପାଖରେ

ଆଈ ନାଲି ଓଠ ଦେଖି ଅଜା ବୁଢା 

ଅଜା ଜରଜର ରାଗରେ ।

ଅଜା ପଚାରିଲେ ଆଈ ବୁଢୀକୁ 

କୋଉଠୁ ଆଣିଲୁ ତୁ ପାନ

ନାତିଆ ଟୋକାଟା ଅାଣି ଦେଲା ପାନ

ନାତି ମୋର ସୁନା ସପନ ।

ଆଈ ପଛରେ ଛପିଥିଲା ନାତି

ଧରି ଯେ ଆଣିଥିଲେ ଅଜା

ନାତିଆ ପିଠିରେ ଲଗାଇଣ ତେଲ 

ବଜାଇଲେ ତ ଅଜା ବାଜା ।