କାଶ ପାଇଁ ଚିକିତ୍ସା
କାଶ ପାଇଁ ଚିକିତ୍ସା
ଡାକ୍ତର କହିଲେ ରୋଗଟା ବିଷମ
ବିଳମ୍ୱ ଆଉ ନକର
କଷ୍ଟ ଯନ୍ତ୍ରଣାରୁ ମୁକ୍ତି ପାଇବାକୁ
ସବୁର ପରୀକ୍ଷା କର ।
ରକ୍ତରେ ଚାପଟା ବୃଦ୍ଧି ପାଇଅଛି
ବଢିଛି ବି ମଧୁମେହ
କାଶ କଫ ଭରିଯାଇଛି ଛାତିରେ
ନିଶ୍ବାସ ଦୁର୍ଗନ୍ଧମୟ ।
ବିଳମ୍ୱ କରିବା ଉଚିତ ହେଇନି
କରିବ ଏବେ ଭରଣା
ଚିକିତ୍ସା ଆରମ୍ଭ କରିବି ଏବେଠୁ
ଚାଲିବା ବୁଲିବା ମନା ।
ଛାତିର ଏକ୍ସ-ରେ, ରକ୍ତର ପରୀକ୍ଷା
ସୋନୋଗ୍ରାଫି ଶରୀରର
ବ୍ରେନ୍ ସ୍କାନିଙ୍ଗ୍ ସାଙ୍ଗକୁ
ହାର୍ଟ ଷ୍ଟ୍ରେସ୍ ଟେଷ୍ଟ୍ କର ।
ଛାତିକୁ ବାଡେଇ, ପିଠି ଥାପୁଡେଇ
ଆଖିକୁ ଦେଲେ ମେଲେଇ
ଅନ୍ୟ କେତେ ସବୁ ପରୀକ୍ଷା ପାଇଁକି
ଲିଇଷ୍ଟ ଦେଲେ ବଢେଇ ।
ରୋଗୀର ମୁଖରେ ଫୁଟିଲା ଆତଙ୍କ
କି ରୋଗେ ପୀଡିତ ସିଏ
ସେମିତିଆ କଷ୍ଟ ଅନୁଭବ କାହିଁ
କରିନି ତ ଆଜି ଯାଏଁ !
ସାମାନ୍ୟ ଥଣ୍ଡାରୁ କାଶଟା ହେଉଛି
ଗଲା ଦୁଇ ଦିନ ଧରି
ନିଦରେ ବ୍ୟାଘାତ ହେବାରୁ ଆସିଛି
ସାର୍ ଙ୍କୁ ଦେବ ପଚାରି ।
ଏଠି ଆସି ଆଜି ଜାଣୁଛି ଏବେ ସେ
ସାଂଘାତିକ ତା’ ଅବସ୍ଥା
ଘରଲୋକେ ଶୁଣି ମୁଣ୍ଡ ପିଟିଦେବେ
କେମିତି ଲୁଚିବ କଥା ?
ପୁଅ ପାଠପଢା ସରିନାହିଁ, ଅଛି
ଝିଅ ବାହାଘର ଚିନ୍ତା
ବାପାବୋଉ ପିଚ୍ଛା ଔଷଧ ଖରଚ
ଦିନକୁ ହଜାରେ ଟଙ୍କା ।
କୁଣିଆ ମଇତ୍ର ଚାହିଁ ବସିଛନ୍ତି
ପାଇବେ କିଛି ସାହାଯ୍ୟ
କାହାକୁ କେମିତି ବୁଝେଇ କହିବ
ହୋସ୍ ଉଡିଯାଏ ଆଜ ।
ଘରଣୀଙ୍କ ପାଇଁ ଯୋଗାଡିନି କିଛି
ଅନ୍ଧାର ଭବିଷ୍ୟତ
ଏମିତି ବେଳାରେ ଡାକ୍ତର କୁହଇ
ଚିକିତ୍ସାର ଜରୁରତ ।
ଏତେ ରୋଗ ତାକୁ କେବେଠୁ ହୋଇଲା
କାହିଁ ପାରିଲାନି ଜାଣି ?
ଜାଣିଥିଲେ ରହିଥାନ୍ତା ସାବଧାନେ
ଔଷଧ ଖାଇକି କିଣି ।
ଓଠ ଶୁଖିଯାଏ, ଛାତି ଥରିଯାଏ
ଯାଉଛି ଅନ୍ଧାର ଘୋଟି
ଏମିତିରେ ଆଉ ଘଡିଏ ବିତିଲେ
ମରିଯିବ ଛାତି ଫାଟି !
ତା’ ନିରବତାକୁ ହେଜି ଡାକତର
କହିଲେ ଅଳପ ହସି
କାହିଁ ଏତେ ଚିନ୍ତା କରୁଅଛ ତୁମେ
ବାଆକୁ ବତା ତ ଅଛି !
ପରୀକ୍ଷା ସବୁ ମୁଁ ଯାହା କହିଗଲି
ଜରୁରୀ ଅଟେ କରିବା
ହେଲେ ଯଦି ସବୁ କରିବ ଏଇଠି
ପାଇବ ବଡ ଫାଇଦା ।
ପଚାଷ ପର୍ସେଣ୍ଟ ରିହାତି ଦଉଛୁ
ଆମରି ରୋଗୀଙ୍କ ପାଇଁ
ଛାଡ କରିଦେବି ଫିସ୍ ବି ମୋହର
ବ୍ୟସ୍ତ ଜମା ହୁଅନାହିଁ ।
ପଚାଷ ହଜାର ମାତର ଖରଚ
ହେବ ତୁମ ଚିକିତ୍ସାରେ
ନିଜ ସୁବିଧାରେ ଭରି ବି ପାରିବ
ଦେଖିକି ତିନି କିସ୍ତିରେ ।
ଦାନ୍ତ କାମୁଡିକି ଚାହିଁଥିଲା ରୋଗୀ
ଡାକ୍ତର ବାବୁଙ୍କ ଆଡେ
କାହିଁକି କେଜାଣି ଶାଗୁଣାର ହସ
ଦିଶିଯାଏ ସେ ମୁହଁରେ ।
‘କାଲିକୁ ଆସିବି’, କହିକି ଫେରିଲା
ଦରଜା ଆଉଜି ଦେଇ
ଦୋକାନରୁ ଦୁଇ ଟଙ୍କାର ଔଷଧ
ଆଣି ନିଜେ ଦେଲା ଖାଇ ।
ନିଦେ ଶୋଇଗଲା ସାରା ରାତି ସିଏ
କମ୍ୱଳଟା ଘୋଡିହୋଇ
ସକାଳ ପାହିଲେ ଦେଖିବ କାଶଟା
ଅଛି ନା ଗଲା ଉଭେଇ ।
-0-