ଆର୍ଯ୍ୟ ଅତିଥି,ଶ୍ରୀ ଗଣେଶ !

ହେ ଗଣେଶ ! ପ୍ରିୟ ଗଣଙ୍କ ଈଶ୍ୱର

ବିଘ୍ନ ବିନାଶକ

ଗଣାଧିପତି ।

କୃଷ୍ଣ ପକ୍ଷ ପୁଣ୍ୟ ଚତୁର୍ଥୀ ତିଥିର

ସୁଦିବ୍ୟ ଦେବତା

ଆର୍ଯ୍ୟ ଅତିଥି ।

ସମସ୍ତଙ୍କ ପାଇଁ ବିଦ୍ୟା ଦାତା ତୁମେ

ମୋ'ପାଇଁକି ଜଣେ

ମଙ୍ଗଳାକାଂକ୍ଷୀ ।

ପ୍ରାପ୍ତ ବୟସ୍କ ମୁଁ ମୋ'ଶୁଭ ପ୍ରାପ୍ତି ର

ନିସ୍ତବ୍ଧ ନାୟକ

ସାୟନ୍ତ ସାକ୍ଷୀ ।

ତୁମ ଆଗମନେ ନୈରାଶ୍ୟ ନିର୍ବାକେ

ଆଶାର ଆଲୋକେ

ଧରା ମହକେ ।

ପର୍ବ ପର୍ବାଣୀର ଆରାଧ୍ୟ ଆରମ୍ଭ

ତୁମରି ସଂକେତେ

କରନ୍ତି ଲୋକେ।

ଦେବତା ମାନେ ବି ସିଦ୍ଧ ସାଧକର

ଅମ୍ଳାନ ମର୍ଯ୍ୟାଦା

ତୁମକୁ ଦେଇ ।

ଗୌରବ ଲଭନ୍ତି ନିର୍ବିଘ୍ନ ହୁଅନ୍ତି

ପଦେ ପଦେ ତୁମ

ନାମକୁ ନେଇ ।

ଆହେ ବକ୍ରତୁଣ୍ଡ ! ଆହେ ମହାକାୟ !

କରିଛ ପ୍ରମାଣ

ଏ ଜଗତରେ ।

ବାହ୍ୟ ରୂପ ନୁହେଁ, ଗୁଣ ଓ ଚରିତ୍ର

ମହତ ଅଟଇ

ସାରା ବିଶ୍ୱରେ।

ଆହେ ଗଜାନନ, ଗିରିଜା ନନ୍ଦନ

ଯେ ଭାବରେ ତୁମେ

ପୂଜା ପାଉଛ ।

ହୃଦୟ କନ୍ଦର ଭକ୍ତିର ନିର୍ଝର

ଢ଼ାଳି ଦିଏ ପୁଷ୍ପ

ଅଞ୍ଜଳି ଗୁଚ୍ଛ ।

ବୈଦିକ କାଳର ଅର୍ଚନା ମୁଖର

ନମ୍ର ନୈବେଦ୍ୟ

ଏବେ ପାଉନି ।

ଭକ୍ତି ଭାବନାରେ ବ୍ୟବସାୟିକତା

ଚାକଚକ୍ୟ ରୀତି

ଭରି ଗଲାଣି ।

ଆହେ ଗଣପତି ଏତିକି ମିନତୀ

ଦୋଷ ଦୁର୍ବଳତା

ଧରିବ ନାହିଁ ।

ନିର୍ବୋଧ ପଣକୁ ସିଦ୍ଧି ପ୍ରଦ ହୋଇ

ମଙ୍ଗଳ ମନାଶି

ଦେବ ଘୋଡାଇ ।

ଆବାହନୀ ମନ୍ତ୍ରେ ତୁମରି ପ୍ରଚ୍ଛଦେ

ଅନ୍ୟ ଦେବା ଦେବୀ

ଅତିଥି ହେବେ ।

ଜୀବ ଜଗତର ମଙ୍ଗଳ ମନାଶି

ଚଉଦ ଭୁବନ

ହସାଇ ଦେବେ ।