👆 👇ପ୍ରଥମ 👇👆

                  ପ୍ରଥମ 

 

କଥାରେ ଅଛି "First Impression  , Lasts Long ". କାହିଁକି ?? କାରଣ ପ୍ରଥମ ର ଏକ ଅନୁଭବ କିଛି ଅଲଗା ନିଶ୍ଚିତ । ପ୍ରଥମଟା ସବୁବେଳେ ପ୍ରାୟତଃ ଭଲଲାଗେ । ତା'ପରର ସବୁ ବାସ୍ ଏମିତି ଏମିତି . . . ହଁ ବେଳେ ବେଳେ ତାହା ଆହୁରି ବେଶି ବେଶି ଭଲଲାଗେ ତ ବେଳେ ବେଳେ ସେଇ  ଭଲଲାଗିବାଟା ଧୀରେ ଧୀରେ କମି କମି ଆସେ । ଅବଶ୍ୟ ନିର୍ଭର କରେ ସ୍ଥାନ, କାଳ ଓ ପାତ୍ରକୁ ନେଇ । ତେବେ ମୋର କେଇ ପଦ ଏ "ପ୍ରଥମ "କୁ ନେଇ  . . . . 

 

ବ୍ୟାକରଣ ଓ ବନାନ ଗତ ତ୍ରୁଟି ମାର୍ଜନା କରିବାକୁ ଅନୁରୋଧ ।

 

ପ୍ରଥମ ସ୍ମୃତିଟି ସଭିଙ୍କ ଜୀବନେ 

                         ସବୁଠୁ ମଧୁର ଥାଏ ,

ଦିନ ପରେ ଦିନ ବିତି ଗଲାପରେ 

                         ସ୍ମୃତି ବଢ଼ି ହଜି ଯାଏ ।୧।

 

ପ୍ରଥମ ଛୁଆଁଟି ମିଠା ମିଠା ଲାଗେ 

                     ତାପରେ ଯେ ସବୁ ଫିକା , 

ପ୍ରଥମର ସବୁ କଥା ମନେ ରହେ

                      ସବୁରି ଜୀବନେ ଏକା ।୨।

                     

ପ୍ରଥମ କାକଳି ତା ଜୀବନ୍ୟାସର

                     ଖୁସିର ଲୁହ ଯେ ଦିଏ ,

ବଡ଼ ହୋଇ ସେହୁ ମୁଖରା ଟେ ହୁଏ 

                     ଦୁଃଖ ର ଲୁହ ଝରାଏ ।୩।

 

ପ୍ରଥମ ଚାଲିରେ ପଡ଼ି ଝୁଣ୍ଟୁ ଥାଏ 

                      ଦେଖି ପୁରିଯାଏ ଆଖି ,

ପ୍ରତିରୂପକୁ ତା ନପାଏ ନିକଟେ 

                      ସେଇ ମନ ଯାଏ ଶୁଖି ।୪।

 

ପ୍ରଥମ ଡାକରେ ମାଆ ମାମା ଅବା

                     ବାପା ବାବା ଗୁଞରିତ ,

ବାପା ମାଆ ଦିନେ ଅଲୋଡ଼ା ହୁଅନ୍ତି 

                     ମନ ହୁଏ ସନ୍ତାପିତ ।୫।

 

ପ୍ରଥମ ପ୍ରଥମ ବିଦ୍ୟାରମ୍ଭେ ପାଠ

                     ପଢ଼ି ବାକୁ ଲାଗେ ଭଲ ,

ଦିନକୁ ଦିନ ଯେ ସେଇ ପଢ଼ା ପ୍ରତି 

                     ସରିଯାଏ ଯେତେ ଗେହ୍ଲ ।୬।

 

ପ୍ରଥମ କୈଶୋର ଲାଗେ ବିହଙ୍ଗିତ

                        ମନ ଉଡ଼ି ବୁଲୁ ଥାଏ ,

ଧୀରେ ଧୀରେ ସେହୁ ହୁଅଇ ଲାଂଛିତ 

                        ହୃଦୟ ବି ଭାଙ୍ଗି ଯାଏ ।୭।

 

ପ୍ରଥମ ପ୍ରେମର ସବୁତକ ସ୍ମୃତି 

                    ଲାଗଇ ତ ଭାରି ମିଠା ,

ପାଶେ ପାଇଗଲେ ମନ ଭରିଯାଏ

                    ତାପରେ ଯେ ସବୁ ଫିକା ।୮।

 

ପ୍ରଥମ ଚାକିରୀ ଭାରି ଭଲ ଲାଗେ 

                   ଚଞ୍ଚଳ ଚାଲଇ ପାଦ , 

କାମର ଲହଡ଼ି ମାଡ଼ି ଯାଏ ଯେବେ

                   ପିତା ବି ଲାଗଇ ପଦ ।୯।

 

ପ୍ରଥମ ପ୍ରଥମ ବିଦେଶୀ ଜୀବନ 

                   ମନ ଯାଏ ସେଠି ହଜି ,

ଦିନ ପରେ ଦିନ ଯାଉଥାଏ ବିତି

                   ସୁଖ ପାଆନ୍ତି ନି ଖୋଜି ।୧୦।

 

ପ୍ରଥମ ଦିନରେ ନବଦମ୍ପତ୍ତିଙ୍କୁ

             ଜୀବନଟା ଲାଗେ ସୁଖ ,

ବର୍ଷ ପରେ ବର୍ଷ ଗଡ଼ି ଚାଲିଥାଏ 

             କିଏ ବା ଦେଖେ କା ମୁଖ ।୧୧।

 

ପ୍ରଥମେ ପ୍ରଥମେ ବୋହୂ ଟିଏ ସିନା

               ସଭିଙ୍କ ମନକୁ ଜିଣେ ,

ଧୀରେ ଧୀରେ ଧୀରେ ସମୟ ସୁଅରେ

                ସମ୍ପର୍କକୁ ସିଏ ଭିଣେ ।୧୨।

 

ପ୍ରଥମେ ପ୍ରଥମେ ବନ୍ଧୁତ୍ୱର ଭାବ 

                  ଲାଗଇ ଅତି ନିଜର ,

ଦିନ ପରେ ଦିନ ବିତି ଚାଲିଯାଏ 

                  ସେ'ବି ହୋଇଯାଏ ପର ।୧୩।

 

ପ୍ରଥମେ ପ୍ରଥମେ ପଡ଼ିଶା ସମ୍ପର୍କ 

                     ଲାଗୁଥାଏ ଯେ ମଧୁର ,

ଅଳପ ବହୁତ ମିଶି ମାଶି ଗଲେ

                     ବାହାରେ ସବୁ ଛିଦର ।୧୪।

 

ପ୍ରଥମ ଦର୍ଶନେ ଅତିଥି ଆତିଥ୍ୟ

                     ମନରେ ଭାରି ସରସ ,

ବେଶୀ ଦିନ ସେହୁ ଆତିଥ୍ୟ ଯେ ପୁଣି 

                     ଫେଡ଼ାଏ ସବୁ ହରଷ ।୧୫।

 

ପ୍ରଥମ ପ୍ରହର ସବୁଠୁ ସୁନ୍ଦର 

                      ଲାଗେ ଅତି ମଧୁମୟ ,

ଧିରେ ଧିରେ ବୋହି ସମୟର ସୁଏ

                       ମନ ହୁଏ ବିଷମୟ ।୧୬।

 

ପ୍ରଥମ କିରଣ ସୂର୍ଯ୍ୟ ଦେବତାର

                    ଦିଶୁଥାଏ କି ସୁନ୍ଦର ,

ବଢ଼ି ବଢ଼ି ଯାଏ ଦିନର ପ୍ର ହର 

                    ହେଉଥାଏ ସେ କଠୋର ।୧୭।

 

ପ୍ରଥମ ବସନ୍ତ ଛୁଅଁଇ ସଭିଙ୍କୁ 

                      ପ୍ରକୃତି ଦିଶେ ସୁନ୍ଦର ,

ଧୀରେ ଧୀରେ ତାର ପ୍ରକୋପ ବଢ଼ିଲେ 

                       ହୁଏ ସେ ଭାରି ନିଷ୍ଠୁର ।୧୮।

 

ପ୍ରଥମ ଦିନଟି ନୂଆ ବରଷର

                    ମଧୁର ମଧୁର ବାସେ ,

ସମୟର ସୁଅ ଭାସି ଚାଲି ଥାଏ 

                    ସରସ ଖସଇ ଆସେ ।୧୯।

 

ପ୍ରଥମ ଜଣାଣ ଅଟଇ ମଧୁର

                    କାଳିଆ ପାଇଁ କି ମୋର ,

ସବୁ ଦିନେ ତାକୁ କରେ ସୁମରଣ

                     ନିଶିଦିନ ମୋ ଅଧର ।୨୦।

 

✍. ବିଶ୍ବ ଭାରତୀ (ଗୋସ୍ୱାମୀ) ଦାଶ .✍

               ବାଙ୍ଗାଲୋର୍ 

           ( 9341374275 )