ଅଧାଗଢା ପ୍ରେମ
ଅଧାଗଢା ପ୍ରେମ
ବହୁ ଦିନ ପରେ ଆଜି ପୁଣି ଥରେ
ପ୍ରିୟା ସହ ଭେଟ ହେଲା
ଜାଣିଲି କାହିଁକି ଏତେ ଦିନ ହେଲା
ମୋ ଠାରୁ ଦୂରେଇ ଥିଲା ।
ବହୁ ଦିନ ହେଲା ଦେଖିବାକୁ ତାକୁ
ମନ ମୋର ଝୁରୁଥିଲା
ଦେଖିଦେଲା ପରେ ଅତି ସହଜରେ
ସ୍ଵପ୍ନ ସବୁ ହଜି ଗଲା ।
ଆଢୁଆଳେ ତାର ଫେରିଯିବି ଭାବି
ଫେରେଇଲି ଯେବେ ପାଦ
କେଜାଣି କାହିଁକି ବୁଲି ଚାହିଁବାକୁ
ମୋତେ ସେ କରିଲା ବାଧ୍ୟ ।
ସିଂଥିରେ ତାହାର ଦେଖିଲି ସିନ୍ଦୁର
ବେଶି ସେ ଝଟକୁ ଥିଲା
ଭାବିଲି ମୋ ଠାରୁ ଆଉ କିଏ ବୋଧେ
ବେଶି ଭଲ ପାଇଗଲା ।
ଏତେ ଦିନ ହେଲା ଯେଉଁ ଆଶା ଟିକ
ମନରେ ମୋ ରହିଥିଲା
କିଛି ମୁହୂର୍ତ୍ତରେ ସତେ କି ଯେମିତି
ସବୁ ଆଶା ମରିଗଲା ।
ସେଦିନ ପାରିବି ମୋତେ ଦେଖି ସିଏ
ସେଇମିତି ହସୁଥିଲା
ହେଲେ ସେହି ହସ ଖୁସି ବଦଳରେ
ଦୁଃଖ ବେଶି ଦେଉଥିଲା ।
ସିଏ କି ବୁଝିବ ଅପେକ୍ଷାରେ ତାର
ଦିନ ମୋର କଟୁଥିଲା
ଆଉ କାହା ସାଥେ ଘର ସଜାଡ଼ି ସେ
ନୂଆ ଖୁସି ପାଇଥିଲା ।
ହୃଦୟରେ ସିନା ଲେଖି ସାରିଥିଲା
ସିଏ ଆଉ କାହା ନାମ
ସିଏ କି ଜାଣିବ ତା’ ପାଇଁ ରହିଲା
ମୋର ଅଧା ଗଢା ପ୍ରେମ ।