ମୁଁ ନାରୀଟିଏ
ମୁଁ ନାରୀଟିଏ
1 min
13.2K
ମୁଁ ନାରୀଟିଏ
*********
ମୁଁ କ’ଣ ଏକା ସ୍ୱପ୍ନର ନାୟିକା
ସ୍ୱପ୍ନରେ ସ୍ୱପ୍ନରେ ରହେ
ବାସ୍ତବରେ ମୁଁ କି ଅସ୍ତିତ୍ୱଶୂନ୍ୟା
ଶୂନ୍ୟରେ ପୂର୍ଣ୍ଣତା ପାଏ ।
ମୁଁ ନୁହେଁ କି କା’ର ଜୀବନ ଆଧାର
ନୁହେଁ ବି ପ୍ରୀତିର ଗୀତି
ଜଳିବା କି ଏକା ଭାଗ୍ୟ ମୋହର
ମରୁବକ୍ଷ ମୋ ନିୟତି ।
ସମର୍ପଣ କି ମୋ ବଂଚିବାର ରାହା
ନିଃଶ୍ୱାସ ନୁହେଁ ସ୍ୱାଧୀନ
ଇଚ୍ଛାତକ ଯେତେ ସାଉଁଟିବା ପାଇଁ
ମନ ତଳେ ନାହିଁ ସ୍ଥାନ ।
ମୁଁ ପରା ଦୁହିତା,ଭାରିଜା,ପ୍ରେମିକା
ମୁଁ ହିଁ ଜନନୀ ଭଗିନୀ
ତଥାପି ତ ମୋର ପରିଚୟ ନାହିଁ
ତୀରହଜା ମୁଁ ତରଣୀ ।
ଦେବୀର ଆସନେ ଅଧିଷ୍ଠିତ ମୁହିଁ
ପୂଜିତ ସମାଜ ଆଗେ
ହେଲେ ମୋର ସତ୍ତା ଏଇ ସମାଜରେ
ଧୂଳିକଣା ସମ ଲାଗେ ।
ଚାଲିବା ପାଇଁକି ପୁଷ୍ପିତ ଗାଲିଚା
ମୁଁ ତ କେବେ ମାଗେନାହିଁ
ନାରୀଟିଏ ମୁହିଁ ବଂଚିବାକୁ ଚାହେଁ
ସ୍ୱଂ ସଂପୂର୍ଣ୍ଣା ହୋଇ ।
ସ୍ନିଗ୍ଧା ମିଶ୍ର