ଇ'ଏ ବିଜୟ ନେତ ଉଡାଏ , ଇ'ଏ କିଏ

ଦୁଲୁକି ଉଠିଲା

ଶିରୀ ମନ୍ଦିର ଲୋ

ଉଛୁଳୁଛି ବଡ଼ ଦାଣ୍ଡ

ଦେଖଲୋ ଦେଖଲୋ

ଉଦେ ହୋଇଆସେ

ସତେକି ପୂନିଅଁ ଚାନ୍ଦ ।।

ତେଲିଙ୍ଗି ମହୁରୀ

ବାଜା ତାଳେ ତାଳେ

ହରିବୋଲ ହୁଳହୁଳି

ଆଲୋଟ,ଚାମର,

ଛତ୍ର ଛାୟା ତଳେ

ଆସେ କେ ହଲି ଦୋହଲି ।।

ଦଣ୍ଡେ ଯାଏ କ୍ଷଣେ

ପହଣ୍ଡେ ପହଣ୍ଡି

କରି, ଏଣେତେଣେ ଚାହେଁ

ନୀଳ କନ୍ଦର ର

ଗୁମ୍ଫା ଗହ୍ଵର ରୁ

ବାହାରୁଛି କିଏ ଇଏ ।।

ଏ ନୀଳଶଇଳ

ନୀଳ ପରବତ

ଐରାବତ ମତ୍ତ ହସ୍ତୀ

ପଲାସି ଆସଇ 

ମହାମେରୁ ଗରୁ

ଅଚଳ କଳା ମୂରତି ।।

ନୀଳାଦ୍ରି ଶେଖରେ

ଶ୍ରୀମନ୍ଦିର ଚୂଳେ

ଊଡାଏ ବିଜୟ ନେତ

ଦିବ୍ୟ ନନ୍ଦିଘୋଷ

କରି ଆରୋହଣ

କରେ ଏଇ ଘୋଷଜାତ  ।।