ବନ୍ଦେ ଉତ୍କଳ ଜନନୀ
ବନ୍ଦେ ଉତ୍କଳ ଜନନୀ
ଉତ୍କଳ ଜନନୀ ନମୋ ନାରାୟଣୀ
ସୌନ୍ଦର୍ଯ୍ୟା ନିପୁଣା ମାତା
ରୂପରେ ଅପୂର୍ବା ଏ'ସୃଷ୍ଟିରେ ତୁ' ଶ୍ରେଷ୍ଠା
ତୁ'ମାଆ ଜଗତ ଜିତା ! !
ପ୍ରକୃତି ବିଭବା ତୁ'ଯେ ସ୍ଵୟଂପୂର୍ଣ୍ଣା
ସୁଶୋଭିତ ବକ୍ଷରାଜି
ସବୁଜିମା ରଙ୍ଗ ସୁରମ୍ୟ ତୋ' ଅଙ୍ଗ
କିଏ ମା' ଦେଇଛି ଖଞ୍ଜି ! !
ପାଦପଦ୍ମେ ତୋ'ର ସପ୍ତସିନ୍ଧୁ ନୀର
ପ୍ରଖ୍ୟାଳନେ ନିୟୋଜିତ
ଶୁଭ୍ରକେଶା ବେଶା ତଟିନୀ ସୁଵେଶା
କଲ୍ୟାଣ ଆଶିଷେ ସ୍ରୋତ ! !
ଅଖଣ୍ଡ ଭୂଖଣ୍ଡ ସୀମା ତୋ' ବିସ୍ତୀର୍ଣ୍ଣ
ଅରଣ୍ୟାନୀ ରାଜରାଣୀ
ଝରଣା ସୁହାନି ନିର୍ଝରିଣୀ ବାଳୀ
ରାଗର ରାଗିଣୀ ମଣି ! !
ପୂରୁବ ପଶ୍ଚିମ ଉତର ଦକ୍ଷିଣ
ଚତୁଃଦିଗେ ପରିପୂର୍ଣ୍ଣା
ବାନ୍ଧ ପାଟ ଶାଢ଼ୀ ରୌପ୍ୟ ତାରକସି
ବସ୍ତ୍ରାୟାଣୀ ଅନ୍ନପୂର୍ଣ୍ଣା ! !
ମାଣିଆ ବନ୍ଧର ବାନ୍ଧ କଳାପ୍ରୀତ
କୁଶଳି ତୋ' କାରିଗର
ସମଲାଇ ପାଟ ପଣତ ବିଚିତ୍ର
ଆହାକି ତୋ' ଉପହାର ! !
ଚିଲିକା ଅଂଶୁପା ରୂପେ ଅପରୂପା
ଚିତ୍ରବର୍ଣ୍ଣା ହ୍ରଦ ହୃଦ
ଶୋଭାର ଭଣ୍ଡାର ଉତ୍କଳ ସଜଳ
ଆତ୍ମତୃପ୍ତି ସୁଖପ୍ରଦ ! !
କାରୁକାର୍ଯ୍ୟ ମୟ ଐତିହ୍ୟ ବିଭବ
ସପ୍ତାଶ୍ଚର୍ଯ୍ୟ କୋଣାରକ
ସୂର୍ଯ୍ୟଦେବ ପ୍ରୀତ ଅଦ୍ୟାବଧି ସତ
ଉତ୍କଳ ଭାସ୍କର ଅର୍କ ! !
ଶ୍ରୀକ୍ଷେତ୍ର ବିଖ୍ୟାତ ଶଙ୍ଖକ୍ଷେତ୍ର ମିତ
ଵିଶ୍ଵ ବ୍ରହ୍ମାଣ୍ଡର କେନ୍ଦ୍ର
ଜଗତର ନାଥ ହୃଦୟ ସଙ୍ଗାତ
ବସିଛନ୍ତି ଖୋଲି ନେତ୍ର ! !
ବଡ଼ ଦେଉଳର ପତିତ ପାବନ
ଉଡେ ସଦା ଫର ଫର
ଉତ୍କଳ ମହିମା ଭାବ ଉଦ୍ଦୀପନା
ଭକ୍ତି ଅର୍ଘ୍ୟ ଭକତର ! !
ଚିର ବନ୍ଦନୀୟା ମାଆ ଉତ୍କଳୀକା
ଶତବାର ପ୍ରଣିପାତ
କବି ବରପୁତ୍ର ତୋ'ର ପ୍ରିୟ ସୁତ
ତୋ'ରୂପେ ବିମୁଗ୍ଧ ସତ ! !
ପୂରୁବ ଗୌରବ ସଦା ଉଦ୍ଭାଷିତ
ଜନ ମାନସରେ ମା'ଲୋ
ଗଙ୍ଗା ଗୋଦାବରୀ ସବୁତ ତୋହରି
ପରିପୂର୍ଣ୍ଣ ଥିଲା କୋଳ ! !
କେତେ ସାଧୁ ସନ୍ଥ ସେବାବ୍ରତୀ ସୁତ
ତୋହରି ଔରସ ବିତ୍ତ
କୀରତି ଅରଜି ପୂଜା ପାଉଛନ୍ତି
ଯୋଗଜନ୍ମା ବରପୁତ୍ର ! !
ମଧୁ ବାରିଷ୍ଟର ଉତ୍କଳ ଗୌରବ
ଗୋପବନ୍ଧୁ ମଥାମଣି
ଫକିରମୋହନ ବ୍ଯାସ ଦେବରତ୍ନ
ସାହିତ୍ୟ ସରାଗି ଗୁଣୀ ! !
ତୋ'ରୂପେ ବିମୁଗ୍ଧ ଗଙ୍ଗାଧର ସୁତ
ପ୍ରକୃତି ଉପାଧି ପ୍ରାପ୍ତ
ଲେଖନୀ ସର୍ବସ୍ଵ ରାଧାନାଥ ବିତ୍ତ
କବିବର ପ୍ରଜ୍ଞାଦୀପ୍ତ ! !
ମାଆ ଉତ୍କଳୀକା ସ୍ମୃ୍ତି ସ୍ମରଣୀକା
ସର୍ବ ଶ୍ରେଷ୍ଠା ମାତୃ ଦେବୀ
ଅକ୍ଷୁର୍ଣ୍ଣ ରହୁ ତୋ' ପୂରୁବ ଐତିହ୍ୟ
ଲେଖୁଥାଉ କବି ଭାବି ! !
- - - - - - - - - - - - - - - - - - - - -
ସଦାନନ୍ଦ ସାହୁ
କାରା କର୍ମଚାରୀ , କେନ୍ଦ୍ରୀୟ କାରାଗାର , କଟକ , ଚୌଦ୍ଵାର , ଭ୍ରାମ୍ୟଭାଷ ସଂଖ୍ୟା- 7978517998
- - - - - - - - - - - - - - - - - - - - - - - -