ଭାଷାଟି ବଞ୍ଚିଲେ ସଂସ୍କୃତି ବଞ୍ଚିବ
ଭାଷାଟି ବଞ୍ଚିଲେ ସଂସ୍କୃତି ବଞ୍ଚିବ
ଭାଷାଟି ବଞ୍ଚିଲେ ସଂସ୍କୃତି ବଞ୍ଚିବ
ପର୍ଶୁରାମ ବିଶ୍ୱାଳ
ଶାସ୍ତ୍ରୀୟ ମାନ୍ୟତା ପାଇଲା ଓଡ଼ିଆ ଭାଷା-ସାହିତ୍ୟ ଆମର
ଏକଥାଟି ଭାବି ଆମ ଗୋଡ଼ ତଳେ ଲାଗୁନାହିଁରେ ଠାକୁର
ଖୁସି ହେଇ ଖଣ୍ଡେ ବହି କିଣିବାକୁ
ମନ ବଳୁନାହିଁ କା’ର ।
ଆମ ଉପଇନ୍ଦ୍ର କବିକୁଳଚନ୍ଦ୍ର ଯେ’ ସାହିତ୍ୟ ସରଜିଲେ
ନାହିଁ କେହି କବି ଏଇ ରବିତଳେ ସମ ହେବ ତାଙ୍କ ତୁଲେ
ତାଙ୍କ ସେ ସାହିତ୍ୟ ନଡ଼ିଆ ଭିତରେ
ସୁସ୍ୱାଦୁ ରସଟି ସାର ।
ପ୍ରକୃତି-ପୂଜକ କବି ଗଙ୍ଗାଧର ତାଙ୍କ ସରି କିଏ ହବ
ଜୀବନ୍ତ ସେ ନଈ, ପାହାଡ଼, ପର୍ବତ ପଢ଼ି ପାଠକ ଜାଣିବ
ଖୁସିରେ କହିବ ହାତେ ସେ ଧରିଚି
ପାରିଜାତ ସରଗର ।
ଯେ’ ଅନନ୍ୟ କାବ୍ୟସମ୍ଭାର ରଚିଲେ କବିବର ରାଧାନାଥ
ପଢ଼ିଲେ ପାଠକ ମଜ୍ଜିବ ହଜିବ ତାଙ୍କ ସାହିତ୍ୟ ଜଗତ
ନିଘା ରଖିବନି ଅବୋଧ୍ୟ ଦୁର୍ବୋଧ୍ୟ
ସେଇ କବିତା ଆସର ।
ଆଜି ହତାଦର ହୁଏ ଆମ ଭାଷା ଦେଖୁଚୁ ଆରେ କହ୍ନେଇ
ସର୍କାର ବି ଭୁଲିଯାଉଚି ଏକଥା, ଦେଏ ତୁ ମନେ ପକେଇ
ଭାଷାଟି ବଞ୍ଚିଲେ ସଂସ୍କୃତି ବଞ୍ଚିବ
ଗଉରବ ସେ ଆମର ।
ବହି କିଣା, ବହି ପଢ଼ା ହେଉ ଆଜି ଓଡ଼ିଆ ପୁଅର କାମ
ମନୋରଞ୍ଜନର ଆନ ଦିଗ ଭୁଲି ଦେଉ ସେଥିପ୍ରତି ଧ୍ୟାନ
ବୁଝେଇଦେ’ ଜଗା, ବଞ୍ଚୁ ଆମ ଭାଷା-
ସାହିତ୍ୟଟି ଯୁଗାନ୍ତର ।
ଗ୍ରା.-ମିତ୍ରସେନପୁର, ପୋ.ଅ.-ଗମୁଁ
ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪
ଫୋନ୍-୯୮୫୩୭୫୯୭୦୦
*****