ଗାଆଁର ବଡ଼ ପରବ

ଦୋଳଯାତ ଆଜି ଦେଖିବା ପାଇଁକି

ମାମୁନି ହେଲାଣି ସଜ ,

କେତେ ପରକାର ଦରବ ଆଣିବ

କରିବ ଭାରି ମଉଜ ।

ଘୋଡ଼ା, ହାତୀ-ଛତି, ରଙ୍ଗ ପିଚକାରି

ଲୁଡ଼ୁଗୋଟି-ପେଏଁକାଳି ,

ଯାତରୁ ଏ ସବୁ ଆଣିବ ବୋଲି ସେ

ଖୁସିରେ ମାରୁଛି ତାଳି ।

ମାଆ କରିଛନ୍ତି କେତେ ଜାତି ପିଠା

ଖାଇକି ସେ ଚୁଲୁବୁଲି ,

ସାଙ୍ଗମେଳେ ତା'ର ଗପୁଛି ସେ କଥା

ଆନନ୍ଦରେ ବୁଲିବୁଲି ।

ଅଳକା, ମାଳିନୀ,ସୁପ୍ରିୟା, ପ୍ରତିମା

ସଭିଏଁ ତ ଭାରି ଖୁସି ,

ଯାତ ବୁଲିଯିବେ,ମଉଜ କରିବେ

ସାଥୀ ହୋଇ ମିଳିମିଶି ।

ଦୋଳ ମଣ୍ଡପରେ କୃଷ୍ଣ ବିଜେ ହେବେ

ଖେଳିବେ ରଙ୍ଗ ଅବିର ,

ସମସ୍ତେ ତାଙ୍କରି-ଦରଶନ କରି

ଆନନ୍ଦେ ହେବେ ବିଭୋର ।

ବରଷକ ପରେ ଆସିଛି ଏ ଯାତ

ଗାଆଁର ବଡ଼ ପରବ ,

ଆନନ୍ଦରେ ତେଣୁ ପାଳନ କରନ୍ତି

ଯେଣୁ ଏ ତାଙ୍କ ଗରବ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।