ଯତି ବଚନ
ଯତି ବଚନ
ତପୀ ତପ ନ କରିବେ
ଅନ୍ନ ଚୋରେଇ ଭୁଞ୍ଜିବେ
ୟେ ସତ୍ୟ ବଚନ ଯେ',
ସ୍ବାମୀକୁ ସ୍ତ୍ରୀ ନ ପୂଜିବ
ପର ପୁରୁଷେ ରସିବ
ଜୀବେ ଜାଣି ଥାଅ ଯେ' । ।। ୪୧ ।।
ଆକାଶୁ ବରଷା ଜଳ
ଧରଣୀ ଲଭେ ଶୀତଳ
ଚାଷୀ କୁଳ ହସେ ଯେ',
କଳିକାଳ କହେ କାନେ
ଜଳି ତପନ କିରଣେ
ପୃଥ୍ବୀ ହେବ ଖାର ଯେ' । ।। ୪୨ ।।
ଘରେ ଘରେ ରାଜନୀତି
ମିଥ୍ଯା କଳହ ଦୁର୍ନୀତି
ଭିନ୍ନ ଭିନ୍ନ ଦଳ ଯେ',
ଟଙ୍କା ମଦ ମାଂସ ଯହିଁ
ମତଦାନ ଥିବ ତହିଁ
ଜୀବେ ଜାଣି ଥାଅ ଯେ' । ।। ୪୩ ।।
ସମାଜ ସଂସ୍କୃତି ଧାରା
ଜାତିଗୋତ୍ର ପରମ୍ପରା
ସମାଜେ ନ ଥିବ ଯେ',
ବନପୁଷ୍ପ ପଶୁପକ୍ଷୀ
ଖୋଜି ନ ପାଇବ ଆଖି
କଳିକାଳ ଅନ୍ତେ ଯେ' । ।। ୪୪ ।।
ତପନେ ତରଳି ହିମ
ବସୁନ୍ଧରା ଜଳ ମଗ୍ନ
ଜୀବେ ଭାସୁଥିବେ ଯେ',
ଶୁଣ ଆହେ ସୁଧୀ ଜନେ
ବିଷ୍ଣୁ ଦାସ ଯତି ଭଣେ
କଳିଯୁଗ ଦେଖି ଯେ' । ।। ୪୫ ।।
କଳକାରଖାନା ମାନ
ଚତୁର୍ଦ୍ଦିଗରେ ସ୍ଥାପନ
ସୁଜଙ୍ଗଲ ପଦା ଯେ',
ବିଷମୟ ପରିବେଶ
ଜୀବେ ହୋଇବେ ନିଶେଷ
କଳିଯୁଗ କହେ ଯେ' । ।। ୪୬ ।।
ଯୌତୁକ ସାବନି ପାଇଁ
ସମାଜ ସଂସ୍କାର କହି
ଗୋରା ଝିଅ ଭଲ ଯେ',
ବେଶଭୂଷାକୁ ରସିବେ
ଅନ୍ନକୁ ନ ଆଦିରେବେ
ଜୀବେ ଜାଣି ଥାଅ ଯେ' । ।। ୪୭ ।।
ବାପ ଛେଉଣ୍ଡ ସନ୍ତାନ
ମାଆ ଥିଲେ ରହେ ମାନ
ୟେ ଯତି ବଚନ ଯେ',
ସାବତ ମାଆ ଯାହାର
ସତେ ଅବା ଯମପୁର
ବିତେ ଦିନ ଦୁଃଖେ ଯେ' । ।। ୪୮ ।।
ଶ୍ରୀ ଲକ୍ଷ୍ମଣ କୁମାର ବେହେରା (ଯତି)
କବି କୁଟୀର
ଦଣ୍ଡାସିଂହା,ବାରକୋଟ
ଦେବଗଡ (ଓଡିଶା)
ମୋ-୦୯୬୬୮୨୪୨୭୨୦