ଆସିଛି ବାହାନା କରି

ତୁମ ବଂଶୀଧ୍ୱନି ଶୁଣିବାକ୍ଷଣି ମୁଁ

ଆସିଛି ବାହାନା କରି ,

ମନ ଖାଲି ମୋର ଛଟପଟ ହେଲା

ପାରିଲିନି ଥୟ ଧରି ।

ଯମୁନାରୁ ନୀର ଆଣିବା ଆଳରେ

ଆସିଲି କଳସୀ ନେଇ ,

କେମିତି ଅବା ମୁଁ ରହିଥା'ନ୍ତି ସେଠି

ତୁମ ପାଶେ ମନ ଦେଇ ।

ଆନମନା ହୋଇ ଆସିଲା ବେଳକୁ

କେତେଥର ଗଲି ଝୁଣ୍ଟି ,

ସେଥିକୁ ମୁଁ ଜମା ଖାତର ନ କରି

ଆସିଅଛି ପଡ଼ି ଉଠି ।

ଦିଅ ଦିଅ ନାଥ ତୁମ ଆଲିଙ୍ଗନ

ଶୁଣାଅ ମଧୁର ବାଣୀ ,

ତୁମରି ପରଶ ପାଇବାକୁ ପରା

ହୃଦ ହୋଇଲାଣି ହାଣି ।

ଶାନ୍ତ କର ଏହି ତାପିତ ପରାଣ

ଭୋଗୁଅଛି ବହୁ ପୀଡ଼ା ,

ତୁମ ପଦ ତଳେ ସବୁ ସୁଖ ମୋର

ଆଉ ନାହିଁ କିଛି ଲୋଡ଼ା ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ ।