ପତିତରକ୍ଷଣ
ପତିତରକ୍ଷଣ
ପଶିଲି ଶରଣ ତୁମ୍ଭରି ଚରଣ
ତଳେ ହେ ନକର ବାରଣ
ତୁମ୍ଭେ କି ଅଜଣା ସହିଲି ଗଞ୍ଜଣା
ଅଧମେ କର ହେ ତାରଣ ।
ଏ ଜୀବନ ପରା ହାହାକାର ଭରା
ଛଟପଟ ମରୁ ବାଲିରେ
ରଖ ଆହେ ସାଇଁ ଅବାଟରେ ଯାଇ
ଥକିଲି ବିଷମ ଚାଲିରେ ।
ପତିତଙ୍କ ସବୁ କ୍ଷେମ ପାଇଁ ପ୍ରଭୁ
ଶଙ୍ଖଚକ୍ର କଲ ଧାରଣ
ଗଜୋଦ୍ଧାର ପରି ମୋର ହାତ ଧରି
ରଖିବାରେ ହୁଅ କାରଣ ।
ସତ୍ୟ ଧର୍ମ ପଥେ ଚଳିବାକୁ ସତେ
କରିଲି ଯେତେକ ଯତନ
ଜୀବନ ସଂଗ୍ରାମେ ହାରି ନିଜ ଗ୍ରାମେ
ତଳକୁ ହେଲା ମୋ ପତନ ।
କର ହେ ଉଦ୍ଧାର ବହେ ଲୁହ ଧାର
ସହି ଏ ଜଞ୍ଜାଳ ଦଂଶନ
ଥାଉଁ ଏତେ ଭାରା ଜୀବନଟା ସାରା
କେତେ ଦେଉଥିବ କଷଣ ?
ଦୁଃଖୀ ଦୁଃଖହାରୀ ନିଳାଦ୍ରିବିହାରୀ
ତୁମ୍ଭେ ତ ଜଗତ ଆଧାର
ଅନ୍ତର୍ଯ୍ୟାମୀ ବୋଲି କହୁନାହିଁ ଖୋଲି
ପ୍ରତିକଥା ପ୍ରାଣ ବାଧାର ।
ତୁମ୍ଭେ ଜଗନ୍ନାଥ ଥାଉଁ ମୁଁ ଅନାଥ
ହେଲେ କି ରହିବ କୀରତି
ପତିତ ରକ୍ଷଣ ଦିଅ ହେ ତକ୍ଷଣ
ଏ ମିଛମାୟାରୁ ବିରତି ।
ପ୍ରସନ୍ନ କୁମାର ମାଦଳା
ଘର ନଂ - ଏଫ୍ / ୧୩
ସେକ୍ଟର - ୪
ରାଉରକେଲା - ୭୬୯୦୦୨
ଦୂରଭାଷ - ୭୯୭୮୧୯୨୨୨୭